د اسد ملیشو په حلب کې ۸۰۰ تنه ملکي وګړي برمته کړي
(کابل ټکی کام ۱۳۹۵ لیندۍ ۲۶) زرغون خوږیاڼی
په سوریه کې د اسد او ایراني ملیشو د حلب ۸۰۰تنه ملکي وګړي برمته کړي او دغلته د ملکي وګړو د لیږدیدلو لړۍ ودرول شوې ده.
د ترکي رسنیو په وینا، ملکي وګړي له حلب ښاره د سره صلیب په بسونو کې لیږدول کیدل چې د اسد رژیم او ورسره نورو بهرنیو پوځیانو په لیږدیدونکي کاروان برید کړی او ۸۰۰ تنه یې برمته نیولي دي.
د سرچینې په وینا، د حلب د ملکي وګړو د لیږدوونکو بسونو په تم ځای کې د چاودنو غږونه هم اوریدل شوي دي.
د ملکي وګړو له برمته کولو وروسته د حلب کلابندو وګړو وتل ځنډول شوي، ویل کیږي چې تر دې مهاله نږدې ۸زره ملکي وګړي خوندي سیمو ته لیږدول شوي، چې ځینې یې د سوریې ادلب ښار ته او ځینې نور یې ترکیې هیواد ته تللي دي.
د اسد حکومت ویلي دي، چې د حلب ښار د ولسي وګړو د ویستلو لړۍ یې درولې ده، دوی ادعا کوي چې انقلابیانو یې د دوو شیعه مېشتو ښارونو اوسېدونکي چې د بشار اسد ملاتړي دي له لیږدول منعه کړي دي او ځينې یې د وتلو پر مهال له ځانه سره بندیان بیولي دي.
په سیمه کې ازادو رسنیو خبر ورکړی، چې د حلب له ښاره د وتلو لیږدیدونکي بسونه د ځايي ملیشو لخوا برمته شوي او د وتلو اجازه وه ورکوي.
ملګرو ملتونو ویلي، چې د حلب په کلابند ښار کې لا هم ۵۰۰۰ ملکي وګړي ایسار دي، چې د لیږد لړۍ یې دریدلې ده.
په همدې حال کې د ترکي خبري اژانس ټي ار ټي ویلي، چې د ترکیې لومړي وزیر بنعلی یلدیریم د روسیې له لومړي وزیر دیمیتري مدویدوف سره د حلب د ملکي وګړو د برمته کولو په اړه ټیلیفوني اړیکه نیولې ده.
بنعلي یلدریم له روسي مشر څخه غوښتي چې د حلب ښار تر تخلیه کولو پورې ددغه ښار ولسي وګړو ته کوم زیان ونه رسیږي او په امنناکه توګه دغه لړۍ سرته ورسیږي.
دیمتری مدویدوف ویلي، چې د حلب ښار د تخلیه موضوع له نږدې څاري، ده زیاته کړه دواړه خواوې په وهڅول شي تر څو اوربند ته ژمن پاتې شي.
