ترکيه: موټربم بريد ۶۰ تنو سرتيرو ته مرګ ژوبله اړولې
(کابل ټکی کام ۱۳۹۵ لیندۍ ۲۷) الماس خدرخیل
د خپرو شويو خبرونو پر بنسټ د ترکيې د قيصري په ولايت کې په امنيتي ځواکونو موتربم بريد ترسره شوی، چې پکې لږ تر لږه ۱۳ تنه وژل شوي او ۴۸ تنه نور ټپيان شوي دي.
د ترکيې پوځ مطبوعاتي څانګې په يوه خپره کړې خبرپاڼه کې ويلي، چې بريد نن سهار مهال د قیصري ولايت د کومانډو ځواکونو د لومړی غونډ په بس موټر ترسره شوی دی.
د ترکيې لومړي وزير مرستيال واستل قیناک رسنيو ته وويل، چې سرتيري په بس موټر کې د رخصتۍ تېرولو لپاره کورونو ته روان وه، چې په لاره کې د سرتيري موټربم بريد سره مخ شول.
د دغه ولايت والي رسنيو ته ويلي، چې پېښه د قیصري ولايت د ايرجيش پوهنتون ته څېرمه سهار شاوخوا اته بجې رامنځته شوې ده. د نوموړي په وينا کيدی شي په دې بريد کې ملکي وګړو ته هم زيان اوښتی وي.
له موټربم بريد وروسته د ترکيې د کورنیو چارو وزیر سلیمان سویلو قیصري ولايت ته سفر وکړ.
د يادونې ده، چې د تېرې شنبې په ورځ د ترکيې استانبول په ښار کې په ضربتي پوليسو دوه پرلپسې چاودنې ترسره شوې، چې پکې د ۳۷ تنو پوليسو په شمول ۴۴ تنه ووژل شول.
