په ترکیه کې د روسیې سفیر د وژنې په غبرګون کې د پوتین خبرداری
(کابل ټکی کام ۱۳۹۵ لیندۍ ۳۰) زرغون خوږیاڼی
په ترکیه کې د روسي سفیر د وژنې په غبرګون کې د روسیې جمهور رئيس ولادیمیرپوتین په بهرنیو ملکونو کې خپلو ټولو دیپلوماتانو ته د ورته بریدونو خبرداری ورکړی.
ولادیمیر پوتین په ترکیه کې د روسي سفیر آندری کارلوف وژنه د دواړو هیوادونو تر منځ یو لمسوونکی عمل بللی دی.
پوتین ویلي، چې په ترکیه کې د روس په سفیر وسله وال برید د روس ـ ترکیې د اړیکو د خرابولو او په سوریه کې د سولې په بهیر کې د خنډ رامنځته کولو په هدف ترسره شوی دی.
نوموړي په انقره کې د روسي سفیر د وژنې په اړه په یوه ځانګړې ناسته کې په ټولو بهرنیو ملکونو کې د روسیې د سفارتونو د امنیت ټينګولو امر وکړ.
د روس ولسمشر د ترکیې له ولسمشره وغوښتل، چې په دغه هیواد کې د روسي دیپلوماتانو امنیت خوندي او تضمین کړي.
تیر ماښام مهال په ترکیه کې د روسیې سفیر اندري کارلوف د انځورونو په يوه نندارتون کې وینا کوله، چې د ترکیې یوه پولیس پرې ډزې وکړې او ځای پرځای یې ووژلو.
بریدګر وروسته خبریالانو ته د خوندیتوب خبر ورکړ او یې ویل، چې «حلب وژغوئ، سوریه وژغورئ».
