(کابل ټکی کام ۱۳۹۵ مرغومی۷) زرغون خوږیاڼی
د سعودي عربستان مشهور خبریال دحام العنزی ویلي، چې د سعودي عربستان هیواد اټومي وسلې لري او د اړتیا په وخت کې به یې پر دښمن وکاروي.
په هیښوونکي او ناڅاپي توګه سعودي عربستان د یو اټومي ځواک لرونکي هیواد په توګه راڅرګند شو، چې په سیمه کې یې خپلو رقیبانو ته ټټر وواهه.
العنزی د «آر ټي» تلویزیون سره په یوه مرکه کې زیاته کړه، چې که اړتیا پیښه شوه سعودي عربستان به پر ایران او اسرائيلو د اټومي وسلو ګذارونه وکړي، د نوموړي دا خبرې «القلم الحر» انټرنیټي صفحې نقل کړی دی.
تر ډیره ویل کیدل، چې سعودي عربستان په نظامي او دفاعي برخه کې د سیمې په کچه یو کمزوری او وروسته پاتې هیواد دی؛ خو یاد خبریال بیا وايي، چې د سیمې د حالاتو په اړه چپ او لاس تړلي نه شو پاتې کیدای.
دحام العنزی د خپل هیواد د اټومي بم په اړه وویل،«د سعودي عربستان د پوځ لاسونه د هغه څه په اړه نه دي تړل شوي څه چې په سوریه، فلسطین او یمن کې تیریږي، که اړتیا پيښه شوه سعودي به پر اسرائيلو او ایران اټومي برید وکړي.»
تر اوسه دغه خبر د سعودي دولتي رسنیو نه دی تائيد کړی.
