د پاکستان هوايي شرکت له ۲۰۰۵ راهیسې افغان دولت ته مالیه نه ده ورکړی
(کابل ټکی کام ۱۳۹۵ مرغومی ۱۵) زرغون خوږیاڼی
د پاکستان هوايي شرکت«PIA» له ۲۰۰۵ز کال راهیسې افغان دولت ته مالیه نه ده ورکړې.
پی آی ای د پاکستان د هوايي ملکي چلند الوتکې دي، چې له یوې لسیزي زیات د افغانستان له هوايي لارې استفاده کوي.
راپورونه وايي، چې د پاکستان پي آی ای هوايي چلند ادارې له ۲۰۰۵ کال راهیسې افغان حکومت ته خپل مالیه نه ده ورکړې او نه یې په دې اړه د افغانستان د هوايي چلند ادارې سره اړیکه نیولې ده.
د مالیې وزارت ویاند اجمل عبدالرحیم زي ویلي، افغان حکومت مکلف دی چې د پاکستان د هوايي چلند اداره د پورونو په ورکړې مجبوره کړي او په دې اړه د افغانستان او پاکستان دواړو خواو یو هیئت وټاکل شي او معلومه کړي دغه پورونه څومره دي او څه وخت یې ورکوي.
د عبدالرحیم زي له خبرو جوته کیږي، چې تر اوسه افغان حکومت په دې هم نه دی پوه چې د پاکستان د هوايي چلند پی آی ای څخه څومره مالیه واخلي او یا یې مالیه کله ورکوي.
