( کابل ټکی کام ۱۳۹۵ مرغومی ۲۹) الماس خدرخیل
د امريکا د متحده ایالاتو ولسمشر اوباما ادارې ويلي، دوی ونه توانېدل چې د ګوانتنامو زندان د خپلې وعدې سره سم وتړي.
د سپينې ماڼۍ وياند جاش انرست تيره ورځ ناوخته رسنيو ته وويل، چې (د وخت د کمښت له وجې د ګوانتانامو زندان نشي تړلی.
نوموړی زياتوي چې دوی د یاد زندان په تړلو کې ډېر کوښښ وکړ، خو د دغه هېواد د ولسي جرګې ځينو غړيو د مخالفت له امله ونه تړل شو.
د امريکا ولسي جرګې له خوا د اوباما په ادارې دا شرط ايښودل شوی و، چې د ګوانتنامو زندان په هکله د هرې پرېکړې کولو لپاره به دوی ته يوه مياشت مخکې خبر ورکوي.
د سپينې ماڼۍ وياند وايي، چې د ولسي جرګې غړيو د ګوانتنامو زندان سره سياسي چلن کاوه.
د اوباما د واکمنۍ په پیل کې په دغه زندان کې شاوخوا ۴۴۸ زندانيان و، نوموړي همغه مهال دا ژمنه کړې وه چې دغه زندان به تړي، د ده د واکمنۍ پر مهال د ګوانتنامو ځينې زندانيانو دوسيې وڅېړل شوې، يو شمير يې خوشې شول او ځينې نور يې اسلامي هېوادونو ته نظربند انتقال کړل شول، چې په همدې سلسله کې لس تنه زندانيان يې د تېرې دوشنبې په ورځ عمان ته واستول شول.
په ورته وخت کې، د دغه زندان يو تن وکيل ای پي خبري ادارې ته ويلي چې د ګوانتنامو زندان کومه ګټه نه لري او خلاص ساتل يې د امريکا په زيان تمامېدلی شي.
په دغه زندان کې د وسلوالو طالبانو لسګونه تنه لوړپوړي چارواکي هم بنديان و، چې پنځه تنه يې د يو امريکايي عسکر په تبادله کې راخوشې شول، همداراز په یاد زندان کې د هېواد وتلی قومندان معلم اول ګل په ګډون يو شمير زندانيان د سختو شکنجو له امله شهيدان کړل شوي هم دي.
اوس مهال د ګوانتنامو زندان کې د افغانانو په شمول شاوخوا ۴۲ تنه بنديان ساتل کېږي.
