(کابل ټکی کام ۱۳۹۵ مرغومی ۲۹) الماس خدرخیل
د پاکستان د بهرنيو اړيکو او ملي امنيت سلاکار سرتاج عزيز وايي، چې په افغانستان کې د سولې اصلي خنډ امریکا ده.
عزيز په خپلو تازه څرګندونو کې ويلي، کله چې اشرف غني ولسمشر شو نو له پاکستانه يې دا تمه درلوده چې طالبان به سولې ته کينوي، خو د هغه په وينا (رښتيا خبره دا ده چې موږ پر دې ډله دومره نفوذ نه لرو.)
د هغه په خبره (له دې سره سره موږ وتوانېدو چې تر شپږو مياشتو وروسته د افغان دولت او طالبانو تر منځ يوه غونډه رامنځته کړو. کله چې د دې خبرو اترو د دوهم پړاو وخت او ځای وټاکل شو، د افغانستان سولې دښمنانو د ملا محمدعمر د مرګ خبر راپورته کړ او د سولې خبرې وځنډېدې.)
نوموړي د افغان سولې په تړاو وويل، کله چې د طالبانو د نوي مشر ملااخترمحمد منصور سره د سولې خبرې تر يوه حده نږدې شوې، امريکا د طالبانو دغه مشر هم وواژه او ټولې هڅې ناکامې شوې.
د دغه هېواد د ملي امنیت سلاکار ادعا کوي، چې افغان دولت او طالبان نه شي کولای دا پرېکړه وکړي چې سوله وکړي او که جګړه.
بل پلو د سولې عالي شورا د بهرنیو اړیکو سلاکار محمد اسماعیل قاسمیار په خپلو وروستیو خبرو کې ویلي و، پاکستان له افغان حکومت سره د طالب مشرانو د اړیکو نیولو اصلي خنډ دی.
د افغان چارواکو په خبره کله چې د طالبانو دوهم لوړپوړي مشر ملا عبدالغني برادر چې د ملا محمد عمر نېږدې کس و وغوښتل، له افغان حکومت سره د سولې په تړاو اړیکه ونیسي، د پاکستان له خوا ونیول شو، چې لا هم په زندان کې دی.
که څه هم دواړه غاړې د سولې هڅو د ناکامېدو پړه پر يو بل اچوي، وسلوالو طالبانو ویلي په وار وار ويلي چې د افغان سولې اصلي اړخ امريکا ده او په وينا يې چې د افغان دولت سره د سولې خبرې کومه لاسته راوړنه نه لري او د دوی اصلي بادار امريکا سره بايد د سولې خبره وشي.
د وسلوالو طالبانو د قطر دفتر شاوخوا يوه مياشت وړاندې ويلي و، که د امريکا او نورو بهرنيو پوځيانو د وتلو ضمانت څوک ورکړي، نو دوی تيار دي چې د افغان دولت سره د سولې ميز ته کښيني.
