(کابل ټکی کام ۱۳۹۵ مرغومی ۳۰) الماس خدرخیل
د پاکستان پنجاب ایالت اړوند پوځي چارواکو ويلي، چې د لشکر جنګوي ډلې نوی مشر اصف چوتو يې په ډزو سره وژلی دی.
د دغه ایالت د ترهګرۍ ضد ادارې په يوه خبرپاڼه کې ويل شوي، چې نوموړی يې د پنجاب ایالت په ختيځ کې له خپلو درېوو نورو ملګرو سره وژلی دی.
ويل کېږي، چې اصف چوتو چې په (رضوان) مشهور و دا مهال يې د لشکر جنګوي ډلې مشري په غاړه لرله.
نوموړی د ترهګرۍ ضد امنيتي ځواکونو په خاصو عملياتو کې وژلی دی.
د دغې ډلې پخوانی مشر ملک اسحاق د ۲۰۱۵م کال په اوومه مياشت کې هم په ورته عملياتو کې د پنجاب ایالت په مظفر ګړ سيمه کې د پوليسو سره په مخامخ جنګ کې سره د ۱۴ نورو ملګرو يوځای ووژل شو.
