سادات:لیکل درکوم په حمل کې بيا کندوز سقوط کوي
(کابل ټکی کام ۱۳۹۵سلواغه ۷) الماس خدرخیل
د کندوز د ولايتي شورا غړي او د دغه ولايت اوسېدونکي وايي، که وسلوال مخالفين همداسې د ښار په نږدې سيمو کې فعاله حضور ولري، نو کيدای شي دغه ولايت په راتلونکې پسرلي کې يو ځل بيا سقوط وکړي.
د یاد ولايت د ولايتي شورا غړي اسدالله سادات ازادۍ راډيو ته وويل: (زه یقین سره ویلای شم چې دوه میاشتې ژمی پاتې دی، وسلهوال طالبان نهشي کولای چې قوي عملیات وکړي، که دولت په دغه وخت کې قوي عملیات ونهکړي او طالبان د کندز له شاوخوا سیمو لېرې نهکړي، زه خط درکوم چې په حمل کې بیا کندز سقوط کوي).
هغه زياته کړه، چې د ولایتي شورا غړو سيمه ييزو چارواکو ته ویلي، چې د کندز امنیت مخ په خرابېدو دی، خو چارواکي زموږ خبرو ته پاملرنه نهکوي.
په ورته وخت کې د کندز اوسېدونکي وايي، چې د دې ولایت روان وضعیت دوی هم اندېښمن کړي، ځکه په ښار کې د خلکو وژنې، وسلهواله غلاوې، اختطافونه او نا امنېو زور اخیستې او که دغه حالت په همدې ډول جریان ولري، نو له دې ولایته به ډېرې شتمن خلک په کډه شي.
د يادونې ده، چې له تېرو دوه کلونو په اږدو کې د کندوز ښار او ځينو ولسواليو دوه ځل د طالبانو په لاس سقوط وکړ او د دغه ښار په نږدې سيمو کې لا هم طالبان واکمن دي، داسې ښکاري چې طالبانو کندوز ولايت په خپله محاصره کې اچولی کله يې چې وغواړي نو سقوط ورکولای سي.
