ننګرهار کې د داعش ۱۶ وسله وال وژل شوي
(کابل ټکی کام ۱۳۹۵ سلواغه ۲۶) الماس خدرخیل
د ننګرهار ولایت چارواکي وايي، چې په دغه ولايت کې يې ۱۶ داعش جنګياليو ته مرګ ژوبله اړولې ده.
د ننګرهار ولایت له مطبوعاتي دفتر څخه رسنيو ته په لېږل شوې خبرپاڼه کې ويل شوي، چې د دغه ولایت په کوټ او هسکه مېنه ولسوالیو کې د تېرو ۲۴ ساعتونو په ترڅ کې د هوایي او ځمکنیو بریدونو له امله ۱۶ د داعش ۱۶ وسله وال وژل شوي او دوه نور ټپیان دي.
خپره شوې خبرپاڼه وايي، ۱۱ داعش وسله وال هغه مهال و وژل شول، چې د هسکې مېنې ولسوالۍ د نرۍ اوبو په سیمه کې تر هوایي برید لاندې راغلل.
سرچينه زياتوي، چې ۵ نور د يادې ډلې جنګيالي د کوټ د سې پای په سيمه کې د ځمکنيو عملياتو پر مهال وژل شوي او دوه نور ټپيان شوي دي.
په دغه خبرپاڼه کې راغلي، چې وژل شوي او ټپیان ټول بهرني وسله وال دي، خو د هغوی هویت یې نه دی په داګه کړی.
خبرپاڼه کې ويل شوي، چې د یادو عملیاتو پر مهال تر دا مهاله په هسکه مینه ولسوالۍ کې څلور کلي د داعش له موجودیت پاک شوي دي.
د ننګرهار سیمه ییزو چارواکو دوه ورځې وړاندې خبر ورکړ، چې دوی د هسکې مينې او کوټ ولسواليو کې د داعش د ځپلو په هدف د شاهین ۲۵ په نامه عملیات پیل کړل، چې د بهرنيو ځواکونو هوايي ملاتړ له ځان سره لري او په وينا يې هغو سيمو ته به وغځول شي چې داعش په کې فعاليت لري.
