امريکا: ډونالډ ټرمپ مک مسټر د ملي امنيت سلاکار ټاکلی
(کابل ټکی کام ۱۳۹۵کب ۳) الماس خدرخېل
د امريکا ولسمشر ډونالډ ټرمپ جنرال هربرټ ريمونډ مک مسټر د ملي امنيت د نوي سلاکار په توګه ټاکلی دی.
مک مسټر تر دې مخکې په افغانستان او عراق کې د امريکا په پوځ کې دنده ترسره کړې ده.
ټرمپ دغه جنرال مناسب او د تجربې لرونکی سړی بللی او ويلي يې دي چې په پوځ کې نوموړي ته ټول احترام لري.
شاوخوا يوه اوونۍ مخکې د امریکا د ولسمشر د ملي امنیت سلاکار مایکل فلین او روسیې ترمنځ پر اړیکو تر نیوکو او فشارونو وروسته، ښاغلي فلین استعفا وکړه.
په ورته وخت کې سناتور جان مکین د مک مسټر په اړه لیکلي: (جنرال مک مسټر د ملي امنیت د سلاکار د دندې لپاره مناسب کس دی. زه له هغه سره د اوږدمهاله پېژندګلوۍ ویاړ لرم، له فکري اړخه، هغه یو پیاوړی سړی دی).
مک مسټر له ډونالډ ټرمپ څخه مننه کړې او ويلي يې دي، چې (زه په لېوالتیا د ملي امنیت له ډلې سره د یوځای کېدو په تمه یم او د امریکا د خلکو د ساتنې لپاره هرکار ته چمتو یم).
د امریکا د ملي امنيت د سلاکار پوست چې لوړرتبه دولتي څوکۍ دی، مستقيماً د ولسمشر په لوري ټاکل کېږي.
