ننګرهار: چارواکي د ۳۰ داعش وسلوالو د وژلو ادعا کوي
(کابل ټکی کام ۱۳۹۵کب۴) الماس خدرخیل
د ننګرهار ولايت چارواکي وايي، چې په دغه ولايت کې يې د عملياتو پر مهال د يوه قومندان په ګډون ۳۵ داعش وسلوالو ته مرګ ژوبله اړولې ده.
د ننګرهار د والي ویاند عطاالله خوګیاڼي رسنيو ته وویل، چې دغه داعش وسلوال يې په تېرو ۲۴ ساعتونو کې د اچین ولسوالۍ په جمال خېل او د هسکې مېنې په ګرګري سیمو کې د ځمکنیو او هوايي بریدونو پر مهال وژلي او ټپيان کړي دي.
نوموړي زياته کړه، په وژل شویو کې د حمزه په نوم د داعش یو قوماندان هم شامل دی.
بل پلو په ختيځ کې د ۲۰۱ سېلاب قول اردو څخه په خپره شوې خبرپاڼه کې هم ويل شوي، چې د شاهين ۲۵ عملياتو پر مهال يې د يادې ډلې ۳۵ وسلوالو ته مرګ ژوبله اړولې ده.
څه موده وړاندې دولتي ځواکونو د شينوارو په ولسواليو کې د داعش پر ضد د شاهين ۲۵ په نوم عمليات پيل کړل، له همدې امله ځایي چارواکي هره ورځ د لسګونو داعشیانو د نيولو او وژلو ادعا کوي.
