ډاکتر آصف
ویل کیږی چې د ایران حکومت په ایران کې د میشتو افغانانو د بې وزلۍ نه ناوړه ګټه پورته کوي، د ایران اخوندانو د هغو ایران میشتو افغانانو لپاره چې په ایران کی د بې وزلۍ ژوند تیروي، یو ګوند تشکیل کړی دی چې نوم یی فاطمیون دی، د دی ګوند له جوړولو نه یواځینۍ موخه داده چې بې وزله او بې روزګاره افغانان دې ته تشویق کړي چې عراق او سوریې ته د سنیانو پر خلاف د جګړې لپاره لاړ شي.
ایرانیان لومړی دغه ډول افغانانو ته د دغه دفتر په ودانۍ کې غونډې جوړوي، هغه ویډیویو فلمونه ورته نمایش ته وړاندې کوي چې داعشی جنګیالي یی له شیعه ګانو سره کوی، برسیره پر دی هغوی ته ښه خوراکونه تیاروي، جیب خرچ ورکوي او جامی او نور لوازم ورکوي، دوی ته داسی ذهنیت ورکوي چې ګوندی تاسی عراق او سوریې ته د شیعه مقدسو اماکنو او روضو د ساتنې لپاره او دفاع لپاره ځۍ.
هلته د حسین رض او علي رض روضې دي او کربلا دښته ده او که داعش هلته حاکم شي نو د روضو ودانۍ به ونړوي او د حسین او علی رض د زیارتونو سپکاوی به وکړی او کربلا دښمته به له مینځه یوسي دا او داسې نور ذهنیتونه ورکول کیږي، او ورپسي هر جګړی ته تلونکی کس ته له ۵۰۰ تر ۷۰۰ امریکایی ډالرو معاش ټاکل کیږي، او په دې سره هم تطمیع کیږي چې که فرضا معیوب او ووژل شي نو کورنۍ ته یې به د ټول عمر لپاره همدغه معاش روان ساتي او په ایران کی به ورته د تل لپاره د پاتی کیدو تابعیت ورکوی او برسیره پر دی به د کور یوه ودانۍ ورکوي.
همدا لامل و چې د عراق او سوریې جګړې له پیل نه تر اوسه پورې نږدې ۸۵۰ افغانان وژل شوي دي، ایرانیان غواړی په دې کار سره افغانان په غیر مسؤلانه توګه په لوی لاس د تباهۍ کندې ته ګوزار کړي او هم د خپلو سرتیرو د وژل کیدو کچه د افغانانو په وژل کیدو سره کمه کړي، له بل پلو نه غواړي چې د سنیانو پر ضد خپله جګړه غښتلی کړي.
تیره ورځ د ایران روحانی مشر خامنه ای د دغو وژل شویو افغانانو کورني ځانته ورغوښتې وې د هغوی د ماشومانو او تور سرو په سرونو یې په ښکاره د ترحم لاس کش کړ او وعده یې ورسره وکړه چې داسې مرسته به ورسره کوی لکه د خپلو سرتیرو د کورنیو سره یی چی کوی، او هم یی د یو یو باب کورونو کلیانی ورته وسپارلی.
خو د افغانستان حکومت په دې هکله هیڅ ډول غبرګون نه پخوا ښودلی او نه یی اوس ښودلی، ځکه چې حکومتي حاکمان چې ژوندی وي نو ټول افغانان دې د دوی له سر نه ځار شي، د دي پرې څه پروا نه راځي، که چیرته حکومت په رښتونی معنی حکومت وی نو ډیر پخوا به یی د ایران د اخوندانو دې کرغیړن عمل پوښتنه کړی وی.
