(کابل ټکی کام۱۳۹۵کب۱۵) الماس خدرخیل
په اسلام اباد کې د افغانستان سفير حضرت عمر زاخېلوال وايي، که پاکستان- افغانستان ته په دوه ورځو کې تړلې لارې خلاصې نه کړې، نو هغه به له کابل نه د بندو مسافرو د انتقال لپاره د ځانګړو پروازونو غوښتنه وکړي.
نوموړي په خپله رسمي فسبوک پاڼه ليکلي، چې د پاکستان له لوري افغانستان ته د لارو خلاصولو په هڅه کې دی او په وينا يې د پاکستان وزیراعظم نوازشريف او د بهرنيو اړيکو سلاکار سرتاج عزيز سره يې په دې اړه خبرې کړي دي.
افغان سفير وايي، چې (سرتاج عزیز راته وویل چی ده ته ډاډ ورکول شوی ؤ چی له دې خوا مسافرو پرمخ لارې خلاصې شوي دي، ما ورته وویل چی دا رښتیا نه ده،د نوموړی په مخکې د تورخم سره په اړیکه کې شوم چی يې وویل لارې د پخوا په څېر بندې دې، ما ورته وویل چې که په راتلونکو دوه ورځو کې له دې لوري لارې خلاصې نشي نو زه به له کابل څخه د بندو مسافرو د انتقال لپاره د ځانګړو پروازونو غوښتنه وکړم چی د دوي لپاره به ښکلی تصویر ونه اوسي).
هغه وايي، چې په دې اړه يې له کابله د افغان مسافرو لپاره د ځانګړو پروازونو غوښتنه هم مخکې کړې ده.
د زاخېلوال په وينا، پاکستاني چارواکو ته يې ويلي، چې نږدې ۲۵ زره افغانان په ويزو راغلي چې زياتره يې غريب خلک، ناروغان او د دوه اوونيو راهيسې دلته بند پاتې دي او په کړيو وعدو عمل نه کېږي.
نوموړي زياته کړې، چې د پاکستان او افغانستان ترمنځ د قانوني تجارت د لارو بندولو موخه افغان اولس ته زيان رسول دي او دوه اړخيزه سوداګري اغېزمنولی شي.
پاکستان د فبرورۍ د مياشتې په ۱۶م نېټه د سندهـ صوبې په سېهون سیمه کې د لعل شهباز قلندر په مزار د شوي برید په سبا له افغانستان سره د تورخم او چمن ترڅنګ ټولې لارې بندې کړي دي.
