(کابل ټکی کام ۱۳۹۵ کب ۲۰) محمد طاهر
جنرال جوزف ووټل چې د منځني ختیځ لپاره د امریکایې ځواکونو قومندان ټاکل شوی پرون خبر ورکړی که امریکا د طالب وسله والو ماتول غواړي نو نور تازه دمي عسکر دې افغانستان ته راولیږي.
افغانستان کې د امریکایي ځواکونو قوماندان جنرال جان نیکلسن هم تېره میاشت افغانستان ته د نورو سرتېرو د اړتیا خبره کړې وه.
خو ویل کیږي چې د ناټو ائتلاف دا مهال افغانستان کې ۱۳۳۰۰ پوځیان لري چې شاوخوا نیمایي یې امریکایي ځواکونه دي.
د امریکا د پوځ د مرکزي قوماندانۍ مشر جنرال جوزف ووټل پرون د امریکا د سنا مجلس د پوځي خدماتو کمېټې ته وویل چې د افغانستان جګړې ختمولو لپاره نوې سټراټیژي جوړول غواړي.
نوموړي زیاته کړه:
موږ د پرمختګ پر یوې سټراټیژۍ کار کوو . په دې اړه اوس مهال له دفاع وزیر سره جنجال لرو. زه او په افغانستان کې د امریکایي ځواکونو قوماندان جنرال جان نیکلسن خپل تر ټولو ښه وړاندیزونه دفاع وزیر ته ورکوو . موږ د پرمختګ په انتظار یو. هغه وايې چې په دې سټراټیژۍ کې افغانستان ته د نورو تازه دمه سرتېرو لېږل شامل دي، څو افغان ځواکونو ته د سلا مشورو او مرستې ماموریت لا نور اغېزمن کړي.”
د افغانستان د دفاع وزارت ویاند جنرال دولت وزیري رسنیو ته وویل، هر هغه اقدام چې د ترورېزم په وړاندي مبارزې او افغانستان کې د جګړې د ختمېدو برخه کې کېږي، دوی یې هرکلی کوي.
جنرال وزیري د افغان ځواکونو پر لاپیاوړي کېدو ټینګار وکړ او ویې ویل:
زموږ پالیسي او دریځ دا دی چې افغانستان کې جګړه د ترورېزم په وړاندې ده. افغانستان د ترورېزم قرباني دی. د امریکا متحده ایالات او ناټو او هم هغه هېوادونه چې له ترورېزمه اغېزمن دي، باید له افغانستان سره مرسته وکړي څو د دغه هېواد جګړه ختمه شي.”
د امریکا ولسمشر ډونلډ ټرمپ د افغانستان د جګړې په اړه کومه نوې ستراتیژي نه ده څرګنده کړې، خو د انتخاباتو پر مهال یې په افغانستان کې د امریکایې پوځیانو ملاتړ یې کړی.
