امريکا افغانستان ته ۹۴ جنګي الوتکې ورکوي

(کابل ټکی کام ۱۳۹۵کب ۲۱) الماس خدرخېل

د امريکا د پوځ د مرکزي قومندانۍ مشر جنرال جوزف ووټل وايي، چې د امريکا حکومت به په راتلونکې کې افغانستان ته د ۵۳ بلک هاک په ګډون ۹۴ الوتکې ورکړي.

نوموړي ويلي، چې د امريکا سنا مجلس ته يې يو وړانديز سپارلی چې پکې د ۸۱۴،۵ ميليون ډالره بوديجه شامله ده.

ويل کېږي، چې د امريکا حکومت به له دغو پيسوافغان هوایي ځواک ته درې پنځوس بلک هاک هيليوکفتر، دیرش MD ، ۵۳۰F جنګي هیلکوپتر، پنځه AC ۲۰۸ ډوله الوتکې او شپږ  A۲۹ جنګي الوتکې برابرې کړي.

ووټل د امريکا د سنا مجلس د پوځي خدماتو له کمېټې غوښتي چې د وړانديز شوې بوديجې طرحه دې زرترزره تصويب شي.

نوموړي په افغانستان کې د امریکايي پوځيانو د زياتولو په اړه وويل:که امریکا د طالب وسله والو ماتول غواړي نو نور تازه دمي عسکر دې دغه هېواد ته راولیږي.

د ناټو ائتلاف دا مهال په افغانستان کې ۱۳۳۰۰ پوځیان لري چې شاوخوا نیمایي یې امریکایي سرتيري دي.