(کابل ټکی کام ۱۳۹۶وری ۱۵) الماس خدرخېل
د کابل ښار اوسېدونکي د غلاوو د پېښو او د وسله والو کسانو له لوري د بیګناه وګړو د وژل کېدو د لړۍ له لوړېدو څخه اندېښمن دي او وايي غلاوې، اختطافونه او جنايي جرمونه ورځ تربلې زياتېږي..
په همدې اړه ليکوال او شناند نظرمحمد مطئن د کابل د عدليې طب د يوې باوري سرچينې له قوله په خپله فسبوک پاڼه ليکي، د عدليې طب ته ورغلم څلور يا پنځه مړي چې په کابل ښار کې وژل شوي و همدې ځای ته راوړل شول.
نوموړی زياتوي، کله مې چې د دې پوښتنه وکړه، نو هغوی د مړو ساتلو ځای ته وروستلم چې ډېر زيات مړي پکې پراته و او کورنۍ يې معلومې نه وې.
هغه ويلي، د عدليې طب مسئولينو راته وويل هره ورځ شاوخوا شل داسې مړي راوړل کېږي، چې موټر ورڅخه غلا شوي وي، په کور کې وژل شوي وي او يا په نورو جرمي پېښو کې يې ژوند له لاسه ورکړی وي.
دا په داسې حال کې ده، چې تېره ورځ هم د کابل ښار په نادريه ليسه کې د يوولسم ټولګي زده کوونکی په چاقو باندې ووژل شو.
په ورته وخت کې د کابل ښار اوسېدونکي وايي، په اناامنيو کې غير مسئوله وسله وال او زورواکي لاس لري.
د کابل د خيرخانې مينې يوه اوسېدونکي احمد شاه کابل ټکی کام ته وويل: (په ښار کې غله او اختطاف کوونکي زيات شوي، هره ورځ غلاوې کېږي، خلک نه شي کولی په ډاډه زړه خپل کاروبار وکړي او په خبره يې چې د غلو له ډاره خپل کاروبار او دکانونه ماذيګر تړو، ځانونه کورونو ته رسوو).
د دې ښار په ځینو برخو کې یوشمېر وسله والې ډلې د خلکو جیبونه لوټي او د دوی پیسې، موبایل او نور قیمتي توکي له ځانه سره وړي.
ويل کېږي، د پولیسو په یونيفارم کې وسله وال غله کورونو ته ورځي او ټول شته يې ورڅخه لوټي، د غلا پر مهال غله ځانونه پولیس معرفي کوي، خو وروسته پولیس له پيښي انکار کوي.
د کابل اوسیدونکي وايي، کله چي خلک کوم غل ونیسي، پولیس مداخله کوي او هغه غل حوزې ته له وړلو وړاندې او یا وروسته خوشې کوي.
