پلچرخي محبس کې یو شمیر زندانیانو خپلې شونډې ګنډلي
(کابل ټکی کام ۱۳۹۶ وری ۱۷) محمد طاهر
د کابل پلچرخي محبس یو مسئول چارواکی عبد الحلیم کوهستانی وايي، د محبس یو شمیر بندیانو خپلې شونډې ګنډلي او د نه خوړو اعتراض يې پیل کړی.
کوهستاني رسنیو سره په خبرو کې وویل، دا ۳۰ کسان چې خولې ګنډلې د هغو ۳۰۰ کسانو په ډله کې شامل دي، چې دوی د بند پاتې برخه په خپلو ولایتونو کې تیرول غواړي.
نوموړی زیاتوي، اعتراض کونکې دا غوښتنه هم لرې چې د خاصو ارزښتونو په ویاړ دې د ولسمشر د عفوې په فرمان کې د دوی قید کم یا خوشې کړی شي.
د کورنیو چارو وزارت د یو شمېر بندیانو له لوري په پلچرخي کې اعتصاب تایید کړ، خو دا یې ونه منله چې ډېرو کسانو خولې ګنډلې دي.
د مشرانو جرګې یوه غړي محمد هاشم الکوزي وویل چې په اعتراض کوونکو کې د مخدرو موادو د قاچاق په تور نیول شوي کسان او د طالبانو غړي هم شامل دي.
خو دولت د سیاسي بندیانو خپلو ولایتو ته لیږل درست نه بولي، ځکه چې هلته طالب بندیان په اسانې سره کولی شي له زندان نه په زور او یا په تخنیکې لارو اوزي.
