شمالي کوريا نظامي او دولتي تاسيساتو ته نږدې سيمې له ملکيانو تخليه کړې
(کابل ټکی کام ۱۳۹۶وری ۲۴) الماس خدرخېل
د شمالي کوريا رسنيو وړمه ورځ د دغه هېواد د چارواکو له قوله وويل، چې د دوی د امريکا سره د احتمالي جګړې ټول تياری بشپړ شوی دی.
د روسيې رسنيو ويلي، چې د شمالي کوريا په پلازمينه پيونګ يانګ کې د احتمالي جګړې خبرداری ورکړل شوی او د دغه هېواد ولسمشر خپلو عسکري قواوو ته د جګړې لپاره د اماده کېدو غږ کړی.
روسي رسنيو د شمالي کوريا د خبري سرچينو له قوله ليکلي، چې د دغه هېواد په مرکز کې د نظامي او دولتي ادارو او تاسيساتو له نږدې سیمو نه د ملکي وګړو د تخليه کولو چارې پيل شوي دي.
دا په داسې حال کې ده، چې د امریکا ولسمشر ډونالد ټرامپ تیره ورځ یو ځل بیا شمالي کوریا وګواښله.
د سپونتيک خبري اژانس ويلي، د امريکا د سمندري ځواک ډله چې پکې اوبلتونه جنګي بيړۍ شاملې دي، چې له ځآن سره د ۱۵۴ په شاوخوا کې د (تاماهاوک) په نوم ورانونکي ميزايل لېږدوي، دوی وايي دغه ميزايل دومره توان لري چې د آرام سمندرګي نه شمالي کوريا په نښه کړي.
روسي چارواکي وايي، د امريکا او شمالي کوريا ترمنځ دجګړې احتمال نورهم زیات شوی دی.
شمالي کوريا وايي، دوی په سيمه کې د امريکا ټول تحرکات څاري او د امريکا د بريد په صورت کې يې ښه ځواب ويلی شي.
د شمالي کوريا له خوا د اتومي وسلو له جوړولو وروسته په دغه هېواد د ملګرو ملتونو د امنيت شورا له لوري پر بالستيک توغنديو هم بنديز ولګول شو، خو شمالي کوريا له ټولو بنديزونو سربيره خپل اتومي پروګرام او بالستيک توغنديو جوړولو ته دوام ورکوي.
