هرات: د اسماعيل خان پلويانو ۲ کسان وژلي او يو شمير ټپيان دي
(کابل ټکی کام ۱۳۹۶وری ۲۹) الماس خدرخېل
د هرات اوسېدونکي وايي، تيره شپه په دغه ولايت کې د پخواني قوماندان اسمعیل خان د پلویانو په هوایي ډزو کې دوه کسان وژل شوي او یو شمېر نور ټپيان دي.
د دوی په وينا، د قوماندان اسمعیل خان په سلګونو ملاتړي پرون ښار ته راوتلي و او د مجاهدینو د بري ورځ یي نمانځله.
دوی وایي، یادو کسانو وسلې درلودې او د اسمعیل خان تصویرونه یي له ځان سره لېږدول او هم یي هوایي ډزې کولی.
پولیس دغه پېښه تاییدوي او وایي چې په دې تړاو یي درې کسان نیولي دي.
د نورو ولايتونو په شمول هرات هم يو داسې ولايت دی، چې پخواني قوماندانان او چارواکي پکې نامسوله وسله وال ساتي او ځينې پخواني وسله وال پکې پراخ فعاليت کوي.
