بلوچستان: ماین چاودنې ۷ مليشه عسکرو ته مرګ ژوبله اړولې
(کابل ټکی کام ۱۳۹۶غوایی ۴) الماس خدرخېل
د پاکستان د بلوچستان په ايالت کې د ايران پولې سره په نږدې سيمه کې د دغه هېواد په سرحدي “اف سي” عسکرو د سړک د غاړې ماين چاودنه شوې چې له امله يې څلور تنه وژل شوي او درې نور ټپيان دي.
راپورونه وايي، دغه عسکر تربت سيمې ته د پلټنې عملياتو لپاره تللي و.
د مليشه ځواکونو وياند خان واسع ويلي، مليشه ځواکونه په خپلو موټرو کې د کچ ولسوالۍ د مند په سيمه کې روان و چې چاودنه پرې وشوه او ياده مرګ ژوبله يې واړوله.
چارواکي وايي، چاودنه د ريموټ کنټرول ماين په واسطه ترسره شوې ده.
امنیتي چارواکو ویلي چې د چاودنې د شدت له امله د عسکرو موټر په بشپړه توګه له منځه تللی دی.
د بلوچستان وزيراعلی نواب ثناءالله زيهري دا چاودنه غندلې او امنيتي ادارو ته يې د پلټنو امر کړی.
د دې چاودنې مسؤليت تر اوسه کومې وسلهوالې ډلې نه دى منلې.
ځايي چارواکو يې پړه په يوه خپلواکۍ غوښتونکې (بلوچستان ليبرېشن فرنټ) وسله والې ډلې باندې اچولی دی.
