حکمتیار صيب ! زما ۱۶ پوښتنو ته سم ځوابونه راکړه.
لیکنه : امين وردګ
حکمتیار صیب ! لومړی خو دا درته وایم ؛ چې ته لاړې نو زه د په تګ سخت خوشاله شوم ، درته مبارک د وي ؛ خبره واوره ! والله که شخصي دښمني درسره لرم ؛ بلکې ټول ماماخېل مې پخوا ستا د ګوند خلک وو او اوس هم ځينې يې درسره شته !
خو له تا سره د الله لپاره دښمني ، یا دوستي کوم !
ته په خپله ، یا د زوی او یا هم ستا کوم خاص کس د زما دغو ۱۶ پوښتنو ته ځوابونه ووايي :
۱ــ حکمتیار صيب ! ما ته داسې یو ((شرعي سند)) وړاندې کړه ؛ چې ستا ورتګ همغه نظام ته (کوم ته به چې تا په خپله خوله [لاسپوڅی او اجير نظام] ویل) پکې روا ثابت شي او که د دغه ځای هم پکې پيدا کړ ؛ چې د نړۍ په سطحه فاسد نظام ته ورتګ آن ثواب هم لري ؛ نو ډېره مهرباني به د وي ؛ تر څو موږ هم درشو او ثواب ــ خورما دواړه وګټو ؟
۲ــ حکمتیار صیب ! تا ولې هغه وخت سوله نه کوله ؛ چې نه کفارو د کوم افغاني مسلمان ((ښځې)) له ځانونو سره بېوولې وې او نه يې د ((بمونو هغه پليته مور)) ستا په پاکه خاوره را غورځولې وه ؟
۳ــ حکمتیار صیب ! آیا تا په خپله نه وو ويلي ؛ چې کله زه د آمریکا له توره لېسته ووزم ؛ نو هغه مهال به ماته سخته د غم خبره وي ؛ نو ته اوس غمجن يې او که خوشاله؟
۴ــ ته دا ۱۷ کاله ولې دغه حکومت ته نه ورتللې چې اوس ورغلې ؛ حال دا چې هغه وخت د اوس په نسبت فساد هم لږ ؤ پکې ؟
۵ــ آيا ته به له دې ها خوا تر هغو نورو (تاوارو جادي رهبرانو) ضعيف نه شې؟
۶ــ آیا تا په دغه ۱۷ کاله کې له دولت سره (په جګړه کې) کوم شهيد ور کړی ، که نه ؟ که د ورکړی وي ؛ هغه ته شهيد وايې ، که مړ ، يا هم بل څه ؟ که يې شهيد بولې ؛ نو له نن نه وروسته چې ستا کوم ملګری د طالبانو په لاس ووژل شي او یا طالب ووژني ؛ هغوی دواړو ته بیا څرنګه خطاب کوې؟
۷ــ چې ته به په هغه پخوانۍ تقوا کې پاتې شې که نه ؛ چې د لارویو موټروانانو ټيپونه به د د ساز د فيتې له امله ورته ټوټه ــ ټوټه کول ؟
۸ــ تا به پرديو ښځو ته کتل سخت حرام بلل ؛ نو د اوسني ماحول سره به څه کوې ، که نه د دغې نکتې د پاره د (په خپل ليکلي تفسير کې) له وخته لا غم خوړلی ؟
۹ــ تا چې په ويډيوګانو کې کومې خبرې مسلمان ملت ته کړې دي ؛ نن خو ته هم پکې ور ګډ شوې ؛ نو آيا په هغو خبرو پښېمانه يې ، که د کومه د خټې پزه ورته جوړه کړې ؟
۱۰ــ ته اوس دولتي خلکو ته څه وايې : چې زه د حقیقت په درک کولو سره دولت ته تسليم شوم او که وايې ؛ چې بد مې کړي ؛ ملت او دولت د ما وبښي ؟
۱۱- هغه کسان ؛ چې ستا تر قومانده لاندې شهيدان شوي دي ؛ آيا د هغوی قبرونو ته د هم په زړه کې شته ؛ چې ورشې ؟ که چېرې ورشې ؛ نو مخامخ ورته درېږې او که څټ ور اړوې او بیا څه ورته وايې ؛ چې ما ولې دا ذلتبار ژوند په دې سپینه ګيره خوښ کړ؟
۱۲ــ ريښتیا ووايه ! دا هر څه خو به د په دې نيت نه وي قبول کړي ؛ چې په راتلونکو انتخاباتو کې کليدي رول و لوبووې ؟
۱۳ــ ستا له هغو مادو نه (چې د خپلواکۍ او اسلامي شعائرو په پار د مطرح کړې وې) کومه يوه يې درسره منل شوې ده او که وي ؛ هغه کومه يوه ده ؟
۱۴ــ هو ريښتیا ! دا د ظهور دواړه ورځې د ولې د ثور له ۷ او ۸ سره جوړې راغلې ؟
۱۵ ــ دا راته ووایه ؛ چې له دې په هاخوا به له طالبانو سره د جهاد اعلان کوې ، که نه او که يې کوې هغه شرعي دليل غواړم ؟ که نه ته هم د سیاپ په ډول وايې ؛ چې (څوک موږ وژني موږ يې خود وژنو؟)
۱۶ــ ستا له نزول نه وړاندې داسې آوازې هم وې ؛ چې ته به د ظهور(دخول / نزول) په ورځ د میلیونونو خلکو له استقبال سره مخ کېږې ؛ مګر د ظهور په لومړی ورځ (۷ د ثور) خو ستا سره په تالار کې یو هغه زموږ تربور غموهلی جومه خان ؤ او نور خو لسګونه وو؛ نو هغه ميليونونه مينوال د څه شول؟
یوه هيله درنه کوم : دا سپي د لږ تړه ؛ ماته غاپي ؛ نو که هغه ساتونکي ته د لږ ووايي ؛ چې غلي یې کړي ؛ ښه به وي ؛ تر څو زه دا نني ځوابونه تر لاسه کړم ؛ چې ومې نه خوري ؛ نور بیا بل وخت ؛ خو د دغو ۱۶ پوښتنو ځوابونه په دغې هفته کې دننه غواړم ؛ مرباني.
