کابل ټکی کام (چهارشنبه، ۱۳ غویی، ۱۳۹۶): د روسیې د دفاع وزرات په یوه خبري اعلامي کې ویل شوي چې د دغه هېواد یو پوځي مشاور ډگرمن “الکسی بوچلینکوف ” په سوریه کې د رژیم له مخالفینو سره په وسله واله نښته کې وژل شوی دی.
“بوچلینکوف” د روسي پوځي مشاور و چې سوریه کې یې د بشار الاسد ځواکونو ته د توپخانې په برخه کې پوځي روزنه کوله .
د روسيې دفاع وزارت زیاتوي چې نوموړی په تمرین بوخت و چې وسلوالو مخالفینو تر برید لاندې ونیو .
همدا رنګه په دغه برید کې د بشار الاسد ځواکونو ته هم درنه مرګ ژوبله اوښتې ده .
په اعلامیه کې دغه راز ویل شوي دي، چې “بوچلینکوف ” د تمرین په حال کې و چې مخالفینو د دوی په یو پوځي واحد برید وکړ نوموړی لومړی ټپي شو او وروسته یې د ژورو ټپونو له امله ساه ورکړه.
د یادونې وړ ده چې له دوو میاشتو راهیسې دا د روسیې هېواد دویم لوی پوځي روزونکی دی چې په سوریې کې وژل کېږي.
خالد وفا
