د امارت درنه پالیسي او که حکمتیار ته درنه څاپېړه ؟

لیکوال : امین وردګ
څو ورځې وړاندې د حزب اسلامي ویاند ادعا کړې وه ؛ چې موږ د اسلامي امارت له سیاسي دفتر سره په تماس کې یو او کېدای شي هغوی هم سولې ته لېوالتیا وښيي .
مګر د اسلامي امارت ویاند دا ادعا رد کړه او و يې ويل چې حزب اسلامي باید د اسلامي امارت له ((درنې پاليسۍ)) څخه غلته ګټه وا نخلي !
دغه خبره ډېره درنه ده ؛ خو که يې حزب اسلامي په مانا پوه شي !
تاسو به ځينې داسې خلک ليدلي وي ؛ چې له یوې خوا په صورت کې قوي وي ، له بلې خوا د عقل له پلوه غني او له دریم لوري نه یې علمي موقف هم ښه لوړ وي ؟
هو ليدلي مو دي.
نو په داسې حالت کې به مو هم ليدلي وي ؛ چې ماشومان يا ښکنځلې ورته کوي او یا یې په تیږو ولي ؟
هو ليدلي مو دي.
داسې به مو نو نه وي لیدلي ؛ چې کله کومې ښځې بدې ردې ورته ويلي وي او یا کوم لېوني ؟
کېدای شي ځينو ليدلي وي !
نو تاسو د هغه شخص عکس العمل څنګه ارزوئ ؟ یانې دغه سړي ته څنګه مناسبه ده او هغوی ته څه ووايي ؟
زما په اند خو دا ورته مناسبه ده ؛ چې فقط هېڅ ځواب هم ور نکړي ؛ ځکه : که يې ځواب ورکړ ارومرو رنګبدی پېښيږي ؛ مګر هو په هغه صورت کې بیا ځواب ورکوي ؛ چې هغوی یا الزام ولګوي او یا ادعا وکړي !
خو دغه هوښیار سړي ته اوس پکار ده ؛ چې د هغوی له شان سره مناسب ځواب ورکړي ؛ نو باید څه ورته ووایي ؟
داسې ورته مناسبه ده : واهلکانو ! هې خويندو ! ما لا تر اوسه کله تاسو ته څه ويلي ! په دغې کوڅې کې مې څومره دروند ژوند درسره کړی ؟
کوم وخت خو به مې څه نه وي درته ويلي ؟
سپکه ، سپوره ، کږه او یا ترخه خو به مې هم نه وي درته کړې ؟
ښه نو … چې دا هېڅ مې هم نه دي درسره کړي او نه مې څه درپسې ويلي نو له تاسو نه زه هيله کوم نه ګيله ؛ چې زه یو دروند شخص یم او د خلکو تر مينځ په ښه شخصیت سره شهرت هم لرم ؛ نو په ما کار مه لرئ ؛ ځکه چې زما حيثيت له مينځه ځې او بل زه دومره وخت هم نه لرم چې له تاسو سره سات تيري وکړ ، راته مناسبه هم نه ده ؛ ځکه چې یو خو زما اوستاسو تر مينځ په هر څه کې توپير شته او بل دا چې وخت د لوبو نه دی!
نو پر ما مې دا خپل موقف ګران دی ؛ چې له تاسو سره کار نه لرم او تاسو پېژنم چې ماشومان یاست ؛ نن مو جګړه وي ، سبا مرور شئ ، بله ورځ بېرته لوبې کوئ او بیا نور په تيږو ولئ !
موږ غټان بیا ستاسو په شان نه یو ؛ خبره مو خبره ده ، جګړه جګړه او دښمني هم دښمني .
موږ د دوست او دښمن تر مينځ توپير کولای شو ، مګر تاسو بیا دا کمال نه لرئ ؛ نن له ښه دوست سره جګړه کوئ او سبا له پاخه دښمن سر غاړه غړۍ شئ ، نن خپلې خویندې د دښمن کوڅې ته لا نه ور پرېږدئ مګر سبا یې کور ته ورولئ ؛ نو ماشومانو او خویندو ! تاسو خو هسې هم د حیثیت ، تاریخ او منزلت پروا نه لرئ !
زما او نورو مشرانو سره بل وخت داسې مه کوئ ، ما ته بيا خنډونه مه جوړوئ ، پرېمېږدئ چې پدې لاره تېر شم او هغه خپل هدف ته ور سېږم ، له تاسو سره وعده کوم چې څه نه درته وايم خو په ما کار مه لرئ.