کابل ټکی کام| غوایی ۲۸، ۱۳۹۶- هند غواړي په راتلونکي کې لس نورې اټومي بټۍ جوړې کړي چې په دې سره به د هند د هیواد د خپلو اټومي بټيو شمېر ۳۲ ته ورسیږي. د هند کابینې د لسو نویو اټومي بټیو د جوړولو پلان تصویب کړی چې په نزدې وخت کې به یې د جوړولو کار هم پیل شي.
د دغو اټومي بټیو له جوړولو سره به د هند هېواد اضافي ۷ زره میګاواټه برېښنا تولید کړي، چې له دې سره به د هند د هیواد د برېښنا کچه دوه برابره زیاته شي. دغه لس اټومي بټۍ به د همدې هېواد له خوا ورغول شي.
دغه پروژه د هند د لومړي وزیر نریندرا مودي د هغو پراختیایي چارو یوه برخه ده، چې د هند په کورنیو تولیداتو ټینګار کوي. دغه پروژه به ۳۰ زره هندوانو ته د کار زمینه برابره کړي. له دغو برېښنایي سهولتونو څخه د هند د هېواد برخمن کول به د نریندرا مودي د کمپاین د ټاکنیزو وعدو پوره کول وي چې ده یې مخکې ژمنې کړې وې له دغو بټیو سره به ډیری کورنۍ له برېښنايي سهولتونو برخمنې شي.
د دغو بټیو جوړل به لږ تر لږه ۵ کاله وخت ونیسي چې ټاکل شوې په ۲۰۲۲ میلادي کال کې به بشپړې او ګټې اخيستنې ته چمتو شي.
