(کابل ټکی کام ۱۳۹۶غوایی ۳۱) الماس خدرخېل
وسله والو طالبانو د زابل ولايت په شاجوی ولسوالۍ کې په يو شمير امنيتي پوستو بريدونه کړي، چې له امله يې ۲۰ پوليس وژل شوي او لسګونه نور ټپيان دي.
د زابل ولايت والي بسم الله افغانمل رسنيو ته وويل، وسله والو تېره شپه په مرکز کلات، دای چوپان، شاه جوی او د کندهار- کلات پر لويه لاره پر پرتو پوستو بريدونه وکړل چې دواړو لوريو ته نښته رامنځته شوه.
هغه ويلي، په دغه بريدونو کې تر اوسه ۲۰ سيمه ييز او ملي پوليس وژل شوي او یو شمير نور ټپيان دي.
هغه وويل، په دغه جګړو کې مخالفينو ته هم مرګ ژوبله اوښتې خو د تلفاتو په اړه يې معلومات ورنکړل.
نوموړی وايي، د مرکز کلات ښار په بيلابيلو دولتي او نظامي ودانيو او تأسيساتو لږ تر لږه څلويښت توغندي لږيدلي، چې مالي او ځاني زيانونه يې هم اړولي دي.
هغه وايي، د جګړو سيمې ته يې نور تازه دمي ځواکونه استولي دي.
يوې ځايي باوري سرچينې کابل ټکی کام ته وويل، د وژل شويو او ټپي شويو پوليسو شمیره تر دې ډيره لوړه ده څومره چې چارواکي وايي.
د سرچينې په وينا لا هم په ځينو سيمو کې جګړه روانه ده.
وسله والو طالبانو د دغه بريدونو مسئوليت په غاړه اخيستی.
د طالبانو له لوري رسنيو ته په لېږل شوې خبرپاڼه کې ويل شوي، چې په دغه جګړو کې يې په زيات شمير دولتي پوستې نيولي او امنيتي ځواکونو ته يې درنه مرګ ژوبله اړولې ده.
طالبانو په دې اړه نور جزيات نه دي ورکړي، خو ويلي يې دي په مرکز کې يې يوه پوسته نيولې او د ولايت ودانۍ او شاوخوا دولتي تاسیسات يې په توغنديو ويشتلي دي.
