د سپين بولدک- چمن لار پرانستل شوه
کابل ټکی کام ۱۳۹۶غبرګولی ۶- د سپین بولدک- چمن دروازه له ۲۲ ورځو تړل کېدو وروسته نن (شنبه) پرانیستل شوه.
د روانې مئ میاشتې په لومړیو کې د افغان او پاکستاني سرحدي ځواکونو د نښتې له امله د سپین بولدک- چمن دروازه د هر ډول تګ راتګ لپاره وتړل شوه، چې نن له ۲۲ ورځو له تېرېدو روسته د دواړو خواوو په خوښه پرانیستل شوه.
پاکستاني چارواکي وايي، د سپین بولدک- چمن لاره یې د افغان چارواکو په غوښتنه او د روژې د میاشتې د احترام له مخې پرانیستې ده.
د پاکستاني پوځ د عامه اړیکو ادارې (آی ایس پي آر) په یوه خبر پاڼه کې ویلي چې دواړو خواوو پر اوربند موافقه کړې ده. په خبر پاڼه کې راغلي چې پاکستان اوس هم د لقمان او جهانګیر کلی خپل ملکیت بولي.
د روانې مئ میاشتې په ۵مه نېټه د افغان او پاکستاني سرحدي ځواکونو تر منځ د لقمان او جهانګیر کلیو پر سر نښته رامنځ ته شوه چې له امله یې دواړو خواوو ته ځاني زیانونه واوښتل.
د سپین بولدک- چمن لاره کندهار او بلوچستان سره نښلوي. په دې لاره باندې هره ورځ له ۱۰ زرو څخه تر ۱۵ زرو پورې خلک تګ راتګ کوي.
