د تخار والي له خپلې دندې استعفا ورکړه
(کابل ټکی کام ۱۳۹۶غبرګولی ۸) الماس خدرخېل
چارواکي وايي، چې د تخار والي محمد ياسين ضياء له خپلې دندې استعفا کړې ده.
د تخار د والي وياند سنت الله تیمور رسنيو ته ويلي، چې ياسين ضياء خپله استعفا د سيمه ييزو ارګانونو د ادارې له لارې ولسمشر ته وړاندې کړې ده.
نوموړي د والي د استعفا لامل په اړه څه نه دي ويلي، خو زياتوي چې تر دې دمه د ولسمشر له لوري استعفا نه ده منل شوې.
د سيمه ييزو ارګانونو د ادارې ويانده منيره يوسف زاده د تخار د والي محمد ياسين ضياء استعفا تائيد کړه او په وينا يې چې د هغه د استعفا لامل شخصي ستونزې دي.
منيره وايي، د ضياء استعفا ليک تېره ورځ دوی ته رسېدلی او دوی ولسمشر ته وړاندې کړی دی خو تر دې دمه د ولسمشر له لوري استعفا نه ده منظور شوې.
ياسين ضياء دوه کاله مخکې د تخار د والي په توګه وټاکل شو او تر دې مخکې يې د ملي امنيت د مرستيال په توګه دنده ترسره کړې ده.
