د راپورونو له مخې طالب جنګیالیو نن سهار وختي ۴ بجې د امام صاحب په بازار باندې پراخ بریدونه پیل کړي چې اوس هم په شدت سره دوام لري.
بریدونه د آقي بای او بخمل، له استقامتونو څخه پیل شوي تر اوسه پورې له پولیسو سره جګړه روانه ده.
د امام صاحب ولسوال امام الدین قریشي، رسنیو ته د تیلفون په کرښه ویلي دي، چې طالبانو خپل ځواکونه د شپې د امام صاحب د ولسوالۍ په بازار کې ځای پر ځای کړي و سهار ۴ بجې یې برید پیل کړ، د نوموړي په وینا دا ځل طالبان ډیر ځواکمن او په ډول ډول وسلو سمبال ښکاري.
قریشي دغه راز ويلي چې تر اوسه له مرکز څخه هېڅ کومکي ځواکونه نه دي ورغلي.
نوموړي همدا ډول زیاتوي تراوسه په نښته کې ۶ پولیس وژل شوي او یو شمير نور ټپیان دي.
د طالبانو ویاند ذبیح الله مجاهد د یو تیلفوني پیغام له لارې رسنیو ته ویلي، چې د دوی ځواکونو د امام صاحب ولسوالۍ په امنیتي پوستو بریدونه پیل کړي دي، سخته نښته روانه ده تر دې دمه د نوموړي په وینا پنځه پوستي د دوی لاس ته ورغلې او سیمه یزو پولیسو ته یې سخت مالي او ځاني زیان اړولی.
له بل لورې د کندز ولایت مقام له سهار راهیسې د هوانونو له برید لاندی دی چې له ځانه سره تلفات هم لري او ۴ تنه ټپیان دي.
دپولیس په وینا په ټپیانو کې پولیس هم شامل دي.
د یادونې وړ ده چې څو ورځې وړاندې هم د کندز ولایت مقام د وسله والو طالبانو د هاوانونو تر برید لاندې راغلی و.
خالد وفا
