فارياب چارواکي: وسله وال بريد کې ۵ عسکر وژل شوي
(کابل ټکی کام ۱۳۹۶غبرګولی ۱۸) الماس خدرخېل
د فارياب ولايت چارواکي وايي، د وسله والو طالبانو په بريد کې د سيمه ييزو پوليسو په ګډون پنځه عسکر وژل شوي دي.
د دغه ولايت د پوليسو وياند عبدلکريم يورش رسنيو ته ويلي، چې بريد پرون ماښام د قرغان ولسوالۍ د ايماق خانه سيمه کې شوی دی.
هغه وايي، په وژل شويو کې يې درې سيمه ييز پولیس دي.
د هغه په وينا، د پېښې له ځای څخه بريد کوونکي تښتېدلي خو زياتوي چې په اړه يې تحقيقات دوام لري.
د دغه بريد مسئوليت وسله والو طالبانو په غاړه اخيستی دی.
د طالبانو وياند قاري يوسف احمدي په خپله رسمي ټويټرپاڼه ليکي، چې په دغه بريد کې د (قومندان اسلام) او (قومندان چاري خان) په ګډون پنځه عسکر د دوی د پلويانو له لوري وژل شوي دي.
د احمدي په وينا په پايله کې څلور ميله وسله هم د طالبانو لاس ته ورغلې ده.
