نړيوال بانګ افغانستان سره د ۵۰۰ ميليون ډالره مرسته کوي
(کابل ټکی کام ۱۳۹۶غبرګولی ۲۴) الماس خدرخېل
نړيوال بانګ له افغانستان سره د ۵۰۰ ميليون ډالره مرسته تصويب کړه، چې دغه پيسې به د افغانستان په پنځو ولايتونو کې په بېلابېلو پروژو ولګول شي.
نړيوال بانګ وايي، دا مرسته داسې وخت کې ورکول کېږي چې د افغانستان، امنيتي او اقتصادي وضعيت له ډير خطر سره مخ دی.
د نړيوال بانک اعلاميه کې راغلي، دغه مرسته شوې پيسې به د افغان مهاجرينو د مينو په بيا اباديو، په پنځو ښارونو کې د پراختيايي پروژو، برېښنايي پروژو او په لېرې پرتو سيمو کې د سړکونو جوړولو په برخه کې ولګول شي.
په اعلاميه کې ويل شوي، له دغو پيسو څخه ۲۰۵ ميليونه ډالره به په هغو سيمو کې ولګول شي، کوم خلک چې د پاکستان څخه د بيرته ستنيدو له امله اغېزمن شوي دي.
د بانک د اعلاميې له مخې، له مرسته شويو پيسو به يې سل ميليونه د اصلاحاتو او سوداګرۍ، شل ميليونه د پنځو ولايتونو په ښارونو کې د عامه خدمتونو او برېښنا په برخه کې او دغه راز ۲۹،۴ ميليون ډالره به د غنمو د زيرمو په رامنځته کولو کې او د غلې د کموالي په لمنځه وړلو کې مصرف شي او پاتې شپيته ميليونه يې د هرات د برېښنا لپاره ځانګړي شوي دي.
بايد وويل شي، چې نړيوال بانک وړمه ورځ په خپل راپور کې افغانستان د نړۍ په کچه څلورم نا امنه هېواد وبللو او زياته يې کړه چې دغه هېواد کې د جګړو له امله د خلکو ژوند د اقتصادي وضعيت او غربت له امله په ټپه ولاړ او زرګونه کسان بې کوره شوي دي.
