(کابل ټکی کام ۱۳۹۶غبرګولی ۲۴) الماس خدرخېل
د هلمند ولايت په ګرشک ولسوالۍ کې نن سهار مهال د يوه سرتيري بريد پر مهال ګڼو کسانو ته مرګ ژوبله اوښتې ده.
چارواکي وايي، دغه سرتيری برید له طالبانو د جلا شوې ملارسول ډلې پر وسله والو شوی خو طالبان بيا وايي چې بريد يې د ملي امنيت د ځانګړو ځواکونو پر مرکز ترسره کړی دی.
په هلمند کې د ايمرجنسي روغتون مسئولينو ويلي چې د ګريشک روغتون ته څلور جسدونه او شپږ تنه ټپيان وروړل شوي او په وينا يې چې د درې ټپيانو روغتيايي حالت نازک دی چې له دې کبله به لښکرګاه ته وړل کېږي.
يوې امنيتي سرچينې افغان اسلامي اژانس ته ويلي چې په دغه بريد کې نهه تنه وژل شوي او شپږ نور ټپيان دي، هغه زياتوي په دې مرکز کې همدا پنځلس تنه ميشت وو.
سيمه ييزې باوري سرچينې وايي، دغه مرکز د ملا محمد رسول د ډلې نه، بلکې د هغو وسله والو لخوا کاريدو چې د سنګوريانو په نوم شهرت لري، د عبد الجبار قهرمان په وړانديز جوړه شوې ډله ده او په هلمند کې ميشت برتانوي ځواکونه يې هم ملاتړ کوي،سنګوريان د ملارسول له ډلې سره نږدې اړيکي لري.
وسله والو طالبانو د دغه بريد مسئوليت په غاړه اخيستی دی.
د طالبانو وياند قاري يوسف احمدي رسنيو ته ويلي (بريد د منصوري عملياتو په لړ کې د ملي امنيت د سنګوري اربکيانو پر ځانګړي مهم مرکز او قرار ګاه د يو تن فدايي محمد نسيم هلمندي له لوري ترسره شو چې پکې د سنګوريانو د عمومي قوماندان وفادار په شمول شپږ ويشت تنه ووژل شول او اتلس نور ژوبل شول.
طالبان وايي، موټر په مکمل ډول تخريب شوی او پکې موټرې او موټرسيکلې ټولې ويجاړي شوي دي.
