(کابل ټکی کام ۱۳۹۶غبرګولی ۲۵) الماس خدرخېل
چين وايي، افغانستان ته د نورو امريکايي ځواکونو راستول به د سيمې پر هېوادونو اغيز وکړي او دا پخپله بې ثباتيو ته لمن وهل دي.
د چين د بهرنيو چارو وزارت وياند لوکانګ افغانستان ته د نورو امریکايي ځواکونو د رالېږلو په اړه د دغه هېواد نظر څرګند کړی او زياتوي چې امريکا بايد د افغانستان خپلواکۍ او عرضي تماميت ته درناوی ولري او د نورو پوځيانو د استولو په اړه له دقت څخه کار واخلي.
د سپوټنيک نيوز د خر له مخې نوموړی وايي، په افغانستان کې د شخړو د ختمولو تر ټولو غوره لار د سولې له پروسې ملاتړ دی او پکار ده چې ملاتړ يې وشي.
هغه وايي، په افغانستان کې د سولې او امن راتللو ته ليوالتيا لري او هڅه کوي چې د افغانستان- پاکستان تر منځ منځګړيتوب هم وکړي.
جېمز متېس د چهارشنبې په ورځ د سنا استماعیه غونډې ته وویل چې ډېر ژر به د افغانستان د ستراتیژۍ او په دغه هېواد کې د امریکایي ځواکونو د شمېر په اړه پریکړه وکړي.
