د هند او افغانستان د تجارتي مالونو د تبادلې د پروازونو لړۍ پيلېږي
(کابل ټکی کام ۱۳۹۶غبرګولی ۲۷) الماس خدرخېل
ټاکل شوې ده، چې د کابل او نوي ډيلي تر منځ د تجارتي موادو د چټکې تبادلې لپاره د پروازونو لړۍ پيل شي.
په کابل کې د هند سفير وايي، د دغې لړۍ د پيل کولو موخه يې د اقتصادي او سوداګريزو اړيکو ته پراختيا ورکول دي.
نوموړي زياته کړه، هند او افغانستان ته د تجارتي مالونو د لېږد رالېږد لپاره د اريانا هوايي شرکت سره قرارداد شوی دی.
د هند د خارجه وزارت وياند ګوپال بګلاو خبريالانو ته ويلي، چې هوايي دهليز د ځمکني ترانزيت پر وړاندې د پرتو ستونزو له امله رامنځته شوی دی.
ویل کېږي، د کابل او نوي ډیلي د تجارتي موادو د تبادلې ځانګړی هوايي دهلېز د پاکستان په هوايي حریم کې تېرېږي.
پاکستان د ځمکې او هوا له لارې هند ته د افغاني مالونو پر انتقال محدوديتونه لګولي او د هند د سوداګريزو مالونو پر انتقال يې يومخيز بندیز لګولی دی.
د چارواکو په وينا، دغه پروازونه به د نړيوال سټنډرډ سره سم د پاکستان په هوايي حريم تېريږي.
د هند په ډیری بازارونو کې د افغانستان وچې مېوې او په ځانګړې توګه غالۍ زيات خريداران لري.
چارواکي وايي، ښايي دغه پرواز په اوونۍ کې يو ځل او يا هم په مياشت کې يوځل ترسره شي.
