انجنير نصرت الله سعيد
د ګډ حکومت ځانګړي ځواکونه که هغه د دفاع وزارت د تشکيلاتو يوه برخه وي او يا د کورنيو چارو وزارت او د ملي امنيت عمومي رياست او يا که (CIA) د خپلو پټو عملياتو لپاره له افغانانو څخه تشکيل کړي دي، له طالبانو سره په جګړه کې ځانګړی کليدي رول لري.
ډير وخت چې طالبان ځينې سيمو کې پرمختګ وکړي يا د کومې ولسوالۍ مرکز او يا کوم ښار ونيسي نو د طالبانو د مقابلې مخنيوي او د له لاسه ورکړو سيمو د بيرته نيولو لپاره ګډ حکومت ځانګړي ځواکونه ورليږي.
ځانګړي ځواکونه د طالبانو د قوماندانانو پر ضد نيږدې ټول هدفي عمليات ترسره کوي او له امريکايانو سره يو ځای د طالبانو په تر واک لاندې سيمو کې د طالبانو پر ضد سترې چاپې او عمليات سرته رسوي.
لنډه دا چې له ځانګړو ځواکونو څخه حکومت په جګړه کې هغه سخت کار اخلي چې د ګډ حکومت عادي نظامي ځواکونه يې سرته نشي رسولای؛ له همدې امله هم بهرنيان او هم د ګډ حکومت چارواکو ځانګړو ځواکونو ته زيات اهميت ورکړی، په روزنه اکمال او تجهيز کې يې خاصه پاملرنه لري.
ځانګړي ځواکونه نظامي امنيتي ارګانونو ته د جذب شویو ځوانانو له منځه د خاصو او پيچلو نورمونو او مواصفاتو له مخي غوره کيږي؛ فکر او عقيده يې مطالعه کيږي، له حکومت سره د کورني تړاو وفادارۍ ته يې کتل کيږي، بدني صحت او روان ته يې ځانګړی اهميت ورکول کيږي. بهرنيانو او ګډ حکومت ته په روانه جګړه کې ځانګړي ځواکونه د ملا د تير حيثيت لري له همدې امله د ګډ حکومت مشر د دفاع وزارت وړانديز منلی او هوډ لري چې د دفاع وزارت په تشکيلاتو کې ځانګړي ځواکونه د فرقې له کچې څخه د قول اردو کچې ته لوړ کړي او دا يې هم پتيلې ده چې د ځانګړو ځواکونو دوه قول اردو ګانې رامنځته کړي.
خو داسې ښکاري چې اوس طالبان د ځانګړو ځواکونو تهديد ته په جدي ډول څک شوي دي او د منصوري عملياتو په ستراتيژۍ کې د ګډ حکومت په ځانګړو ځواکونو سترو سرتيرو بريدونو ته خاص ځای ورکړی.
طالبانو د بلخ په شاهين قول اردو د تلفاتو او تکتيک له پلوه په کم ساري بريد کې تر ډيره بريده د دفاع وزارت ځانګړي ځواکونه په نښه کړل.
همدغه راز يې په (1396/3/6 هـ ش) تاريخ، په خوست ولایت کې د هغه ځانګړو ضربتي ځواکونو څخه چې د (CIA) له لورې تشکيل کيږي اتلس کسه ځای پر ځای ووژل او دا دی پرون د جوزا په اته ويشتمه نيټه يې د پکتيا ولایت د ځانګړو ځواکونو په مرکز ستر ډلیيز سرتیری بريد ترسره کړ، چې تر نهو ساعتونو پورې يې دوام وکړ. حکومتي چارواکو سره له دې چې بريد ډير پراخ، ستر او سخت او اوږد ؤ او ټوله ورځ په ځانګړې قطعه کې دننه جنګ روان ؤ خپل تلفات کم وښودل.
طالبانو د ځانګړو ځواکونو په دغه مرکز کې تر دوه سوه کسانو پورې د دغه مرکز د ټولو عسکرو د وژلو ادعاء وکړه.
د نظامي چارو د کتونکو له انده که چيرې طالبان اردو، امنيت او پوليسو او په ځانګړو ځواکونو خپلو سترو سرتيرو بريدونو ته دوام ورکړي او د حکومت استخباراتي او کشفي ارګانونه يې مخه ونه نيسي دا به د ګډ حکومت په جنګي ماشين سخت فشار وارد کړي، د ګډ حکومت د ځواکونو روحيه به وغورځوي او په جګړه کې به يې د زياتې کمزوری سبب شي.
ځکه که ځانګړي ځواکونه ډير تلفات ويني نو د تشې ډکول يې ګرانه خبره ده او وخت اخلي، ځانګړي کسان غواړي، ځانګړې روزنې ته ضرورت لري همدغه راز پراخو مالي امکاناتو ته ضرورت لري.
