اروپايي ټولنې افغانستان لپاره نوی استازی ټاکلی

(کابل ټکی کام ۱۳۹۶چنګاښ ۱)

د اروپايي ټولنې د بهرنۍ ستراتيژۍ مشرې فدريکا موګريني تېره ورځ په بروکسل کې د افغانستان لپاره نوی ځانګړی استازي د ټاکلو اعلان وکړ.

موګريني د افغانستان لپاره نوی استازی یو تن بلجيمي ديپلومات رولاندکوبیا ټاکلی دی.

هغه وويل، چې دغه استازی به په افغانستان او سيمه کې د سولې د هڅو ملاتړ وکړي.

ویل کېږي، رولاند کوبيا په افريقا او اسيا کې د سولې او پخلاينې په برخه کې پخوانۍ تجربه لري.

نوموړی اوس مهال، په میانمار کې د اروپايي ټولنې د دفتر د مشر په توګه دنده پر مخ وړي.

د افغانستان لپاره د اروپايي ټولنې نوی ټاکل شوي ځانګړی استازی به د روان کال د سپتمبر په لومړۍ نيټه خپله دنده پیل کړي.

اروپایی اتحاديه کې ۲۸ غړي هېوادونه دي چې هر یو يې په اروپایی کمیسیون کې یو استازی لری.

-الماس خدرخېل-