المان راتلونکې اونۍ بیا د رد شويو افغان کډوالو د راستنولو لړۍ پیلوي
د المان رسنۍ وايي، راتلونکې اونۍ یو ځل بیا د رد شویو افغان کډوالو د رالېږلو لړۍ پیلېږي.
د المان هېواد افغانستان ته د رد شویو کډوالو لړۍ وروسته له هغه ودروله کله چې د روانې میاشتې په لومړیو کې پلازمېنه کابل کې درنې چاودنې ترسره شوې.
د شپیګل مجلې په خبره، د رد شویو کډوالو لومړۍ الوتکه به راتلونکې چهارشنبه له لیپزیګ نه کابل ته پرواز وکړي. تر دې دمه رسمي سرچینو په دې اړه څه نه دي ویلي.
وړمه ورځ افغانستان ته د ستنېدونکو کډوالو وزير عالمي بلخي وويل، افغانستان کې امنيتي حالات خراب او د دې قابل نه دي چې په دي سختو حالاتو کې افغان کډوال په زور خپلو کورونو ته ستانه کړل شي. د هغه په وينا هغه هېوادونه چې افغانانوته یې پناه ورکړې، بايد د افغانستان حالات په نظر کې ولري او بيا د افغان کډوالو په اړه پرېکړه وکړي.
المان هغه هېواد دى چې يو شمېر افغانان یې په څو جوپو کې هېواد ته راستانه کړل، خو په کابل کې د تېرو اونیو مرګونو پېښو له امله المان پرېکړه وکړه چې د څو ورځو لپاره رد شوي افغان کډوال په زوره بېرته افغانستان ته ستانه نه کړي.
د ملګرو ملتونو د کډوالو ادارې ويلي دي، په نړیواله کچه د کډوالو او بې ځایه شویو خلکو په کچه کې ډېروالی راغلی، چې شمېر یې ۶۵.۵ میلیونو ته رسېږي. د ۲۰۱۵ کال پرتله په کې ۳۰۰ زره ډېروالی راغلی دی.
