(کابل ټکی کام ۱۳۹۶چنګاښ ۷)
د سعودي عربستان سيمه ييزو چارواکو ويلي، چې حوثي شيعه مليشو يو ځل بيا د دغه هېواد د نجران پر ښار راکټي بريد کړی، چې له امله يې ملکي خلک زيانمن شوي دي.
د دغه ښار د ملکي خونديتوب د ادارې وياند عبدالله سیدالفاري رسنيو ته وويل، چې راکټي بريد د يمن له خاورې د نجران ښار په ملکي ميشت ځايونو ترسره شوی دی.
نوموړی زياتوي په بريد کې د دوه کسانو د ټپي کيدلو سربيره سيمې ته د پام وړ مالي زيان هم اوښتی دی.
د پېښې ټپيان د تداۍ په موخه روغتون ته وړل شوي دي.
بايد وويل شي، چې د سعودي عربستان په مشرۍ ائتلاف له ۲۰۱۵م کال راهيسې د حوثي شيعه مليشو پر خلاف په يمن کې هوايي او ځمکني عمليات کوي.
تر دې مخکې هم حوثي مليشو د سعودي عربستان په نجران ښار دغه ډول راکټي بريدونه کړي، پوځي او ملکي هدفونه يې په نښه کړي، چې خلکو ته يې مالي او ځاني زیانونه هم اړولي دي.
-الماس خدرخېل-
