څو ورځې وړاندې په هرات ولایت کې له سلما بند نه شاوخوا ۱۳ کیلومتره لیرې په یوه پوسته د طالبانو په برید کې ۱۰ دولتي سرتېري ووژل شول او مهمات یې طالبانو له ځان سره یووړل. ځايي چارواکو رسنیو ته ویلي و چې برید پر سلما بند شوی دی، خو طالبان وايي د هرات ولایت په سلما بند یې برید نه دی کړی او نه هم پر یاد بند برید کولو ته اړتیا شته.
د طالبانو ویاند، قاري محمد یوسف احمدي رسنیو ته ویلي ”موږ دغه پروپاګند په کلکه ردوو، زموږ مجاهدین به کله هم په عام المنفعه تأسیساتو برید ونکړي او نه هم دې ډول کار ته کومه اړتیا لیدل کیږي“.
احمدي وايي چې برید له سلما بند نه ډېر لیرې د دولتي سرتېرو پر پوسته شوی دی ”دغه پوسته له سلما بند څخه ډيره لرې موقعیت لري او په هيڅ ډول په بند باندې د برید په معنا نه ده“.
قاري یوسف احمدي همدا راز ویلي ”دا له عقل څخه لرې خبره ده چې په ټوله چشت ولسوالۍ کې به مجاهدین په دښمن برید نه کوي، ځکه چې هلته د سلما بند موجود ده!!؟“.
په افغانستان کې د هند سفير منپريت ووهرا هم ویلي چې پر سلما بند برید نه دی شوی ”.. برید پر سلما بند نه دی شوی بلکه له سلما بند نه په لیرې سیمه کې رامنځته شوی دی“.
تر دې وړاندې هم پر طالبانو تورونه پورې شوي چې عام المنفعه ځایونو باندې بریدونه کوي خو طالبانو تل دا تورونه رد کړي دي.
