د کندز ولایت سیمه ییز چارواکي وايي طالبانو نن سهار د کندز ولایت په مرکز او شاوخوا سیمو بریدونه پیل کړي دي.
د کندز د والي ویاند، سید محمود دانش رسنیو ته ویلي چې طالبانو نن سهار له دوه لوریو د پل الچین په سیمه باندې بریدونه پیل کړي دي. د دانش په خبره جګړه اوس هم روانه ده.
بل خوا د ۸۰۸ سپین زر زون ویاند، محفوظ الله اکبري ویلي “طالبانو نن یک شنبه د سهار په ۹ بجو پر چهاردرې ولسوالۍ او د کندز – خان آباد په لویه لار بریدونه پیل کړي دي؛ جګړه اوس هم جریان لري”.
اکبري زیاته کړه، “طالبانو همدا راز سپېده چاود مهال، د کندز ولایت د مرکز اړوند په تلوکه سیمې هم بریدونه پیل کړي دي. اوس مهال ځمکني او هوايي بریدونه روان دي او تر دې دمه د اوښتو تلفاتو په اړه کوم معلومات په لاس کې نه لرو”.
که څه هم چارواکي وايي چې د طالبانو بریدونه یې په شا تمبولي دي خو د سیمې خلکو رسنیو ته ویلي “طالبانو د پنجشیري قشلاق پراخه سیمه نیولې ده او جګړه اوس هم دوام لري”.
طالبان وايي بریدونه یې د کندز مرکز اړوند سیمو باندې کړي دي. “نن سهار سپېده چاود مهال د کندز ولایت مرکز کې کندز ښار ته څېرمه په تیلاوکي او ملا سردار سیمو باندې له ۲ استقامتونو (ګورتیپې او کنم) څخه د اسلامي امارت مجاهدینو د سپکو او درنو وسلو په وسیله کارنده تعرضي بریدونه پيل کړل”.
طالبان وايي د امام صاحب او دشت ارچي ولسوالیو ته غزېدلې لویه لار هم “د یاد مرکز اړوند دوبلوله سیمه کې په بشپړه توګه د دښمن په مخ وتړله شوه”.
کندز په شمال کې یو له ناامنه ولایتونه نه دی چې طالبان پکې پراخ حضور لري او د ملي وحدت حکومت په جریان کې دوه ځله د طالبانو په لاس سقوط شوی دی.
