(کابل ټکی کام ۱۳۹۶چنګاښ ۱۳)
د امريکا د مشرانو جرګې د وسله والو ځواکونو پنځه کسيز پلاوی چې مشري يې د دغه جرګه ګۍ د مشر جان مککين په غاړه ده، له پاکستان وروسته کابل ته رسېدلی دی.
په کابل کې د ناټو غوڅ ملاتړ ماموريت ويلي، چې دغه پلاوى به د امريکايي ځواکونو له قوماندانانو او سرتېرو سره ګوري.
په دغه کتنه کې له نوموړي سره څلور نور سناتوران هم ملګري دي، چې د ولسمشر غني، اجرائيه رئيس ډاکټر عبدالله او يو شمير نورو چارواکو سره تر ليدنو کتنو او خبرو وروسته به له رسنيو سره معلومات شريک کړي.
د سناتورانو دغه پلاوي تر دې وړاندې دوه ورځې په پاکستان کې تېرې کړې او د هغه هېواد له پوځي او ملکي چارواکو سره يې وليدل.
راپورونه وايي، ياد پلاوي پرون د پاکستان د پوځ له مشر سره يو ځاى له شمالي وزيرستان څخه هم ليدنه وکړه.
د پاکستاني چارواکو سره له کتنو وروسته دغه پلاوي خبريالانو ته وويل، چې په افغانستان کې د شخړې د هواري لپاره د پاکستان رول مهم دی.
امريکايي سناتوران په داسې حال کې کابل او اسلام اباد ته سفرونه کوي، چې لا هم د ټرمپ ادارې د افغانستان په اړه خپله پاليسي نه ده اعلان کړې.
ويل کېږي، د سناتورانو دغه سفرونه د افغان جګړې د ستراتيژۍ د پوره کولو په موخه ترسره کېږي.
تر دې مخکې داسې راپورونه ورکول شوي و، چې د ټرمپ اداره د افغانستان او پاکستان لپاره يوه تګلاره اعلانوي.
-الماس خدرخېل-
