د ډيورنډ په کرښه ګډ عملیات ، که پاکستان ته امتیاز ورکول ؟

لیکوال : امین ودرګ
د امریکې په مشرۍ ! د افغانستان او پاکستان فعلي حکومتونو هوکړه کړې چې : د امریکا تر ليد لاندې به د ډيورنډ دواړو غاړو ته د طالبانو (پښتنو آزادي غوښتونکو) پر وړاندې ګډ عملیات ترسره کوي ؛ چې دوی دغه عملیات د ترورېزم د پټنځایونو ، له منځه وړلو په بهانه پلان کړي دي.
خو راځئ وګورو چې : دلته څه روان دي !
اوسنی افغان حکومت تل په پاکستان تور لګوي چې : ګواکي په افغانستان کې د غربیانو او د هغوی افغان ملګرو پر وړاندې جګړه کوونکي طالبان ؛ پاکستاني فوځیان دي او دوی يې افغانستان ته د خرابیو لپاره راليږي.
مګر پاکستان تل دا تورونه ردوي ، بلکې دا ادعا لا هم کوي چې : په پاکستان کې کومې چاودنې کيږي هغه هم طالبان کوي او دغه طالبان په افغانستان کې اوسيږي ، یانې دوی دواړه لوري یو پر بل د خپلو بامونو واورې ور اچوي ، حال دا چې دواړه خواوې پوچې ادعاوې کوي او هېڅ اساس نه لري.
کله کله دواړه خواوې چې لږ خواله سره وکړي ، بیا نو داسې بهانې هم یو بل ته کوي چې : که طالبان وي هم ! نو زموږ له حکومتونو ډېر ليرې به کرښې ته نژدې پراته وي ، چې له هرې خوا زور پرې راشي ، نو هغې بلې خواته به اوړي ، چې ډېر وخت پاکستان دغه خبره کوي او په همدغې خبره کې یې ستر هدف پروت دی.
دا چې د افغانستان اوسنی نظام مشروعیت نه لري او (پنځوس ـ پنځوس) د جانکيرې په زور را منځته شوی ، نو ځکه خو يې په سر کې پوهان او ځيرک خلک شتون نه لري ، که وي هم کمزوري دي او څوک يې نظر ورکولو ته هم نه پرېږدي ، نو ځکه خو تل له پاکستان څخه غوښتنه کوي چې د طالبانو مخه ونيسه ؟
طبعي ده چې پاکستان به ورته وايي چې : طالبان په پاکستان کې نشته ، که وي هم ، نو کرښې ته نژدې به چېرې په غرونو کې پټ ځایونه لري چې موږ ته نه دي معلوم ، نو که تاسو غواړئ چې موږ یې مخه و نيسو ، بايد د کرښې په سر موږ لومړی امنیتې پوستې جوړې کړو او هلته یو قوي نظامي حضور ولرو ، تر څو هم ستاسو ملک آرام وي او هم زموږ ! خو دا کار لګښت غواړي او موږ دومره توان نه لرو چې ټول سرحد وساتو ، نو مجبور یو چې په ځينو ځایونو کې سیم او په ځينو کې د کندو کينلو له لارې ؛ د دغو خرابکارو مخه و نیسو؟ او که تاسو په سرحد کې زموږ نظامي حضور نه منئ او یا دا چې بد درته ښکاري نو بیا له موږ څخه ګيلې هم مه کوئ ځکه چې موږ خو ولیان نه يو چې په کراماتو سره دا دومره اوږد سرحد وساتو ، دا چې اغزن سیم ، یا کنده او یا هم امنیتي پوستې نه راسره منئ ؛ نو بیا نه یوازې دا چې پر موږ د فشار راوړلو هڅه مه کوئ ، بلکې موږ ته هم چې کوم امنیتي کواښ رامنځه کيږي د هغه مسئولیت په تاسو دی ! او که چېرې په کرښه باندې د تأسيساتو مانع نه ګرځئ ، نو بیا زموږ له خوا که کوم زیان تاسو ته متوجه شو ؛ موږ يې مسئول یو ؟
نو زموږ دغه پوچ مغزي سیاسیون په همدغې خبره تېرباسي ، ځکه خو هر څه ورسره و مني ، خو زما په اند به داسې پېښه شي چې : پاکستان به د ډيورنډ کرښه په دغو (زورواکانو او نامشروعو مشرانو) رسمي کړي او بیا به نړۍ ته معلومه شي چې افغان طالبان تر پخوا لا قوي شول او ټول به ښکاره شي چې په افغانستان کې پټنځایونه څه چې ؛ سم کلي او کورونه لري ، هلته به بیا خلک لاسونه ټکوي چې دا مو څه وکړل ؟
نن چې په پاکستان باندې هر څومره فشار راوړل کيږي ، هغه د پاکستان په ګټه دی نه په زیان !
خصوصاً داسې فشار چې ګواکي (افغان طالبان په پاکستان کې اوسيږي) ځکه چې : د افغانستان له خوا په پاکستان هر څومره فشار وارديږي د هغو دوه برابره پاکستان د ډيورنډ کرښې ته توجه کوي او ځان ورنژدې کوي ترڅو هلته نظامي حضور پيدا کړي چې : همدغه نظامي حضور به په همدغه پوچمغزي حکومت داسې نخرې هم وکړي چې : بیا به خپلې شونډې خوري ، خو څه به يې په وسه کې نه وي.
زما په اند : دا بلکل معقوله لاره نه ده او نه هم دا نظریه د افغانستان په ګټه ده چې : افغان طالبان د پاکستان آله وبلل شي ، همدغه پوچه ادعا به ډېرې نخري په افغانستان او افغانانو باندې وکړي.
زه وایم چې نور باید یوڅه وخت له عقلونو هم کار واخلو او که چېرې نه پوهېږو؛ عاقلانو او عالمانو ته به غوږ شو او له هغوی به یو څه زده کړو ؛ دغه په وچه کې راحصاره خاوره به لږ د ځان وبولو ، باید دا ومنو چې طالبان افغانان دي او په افغانستان کې اوسيږي.
ټوله نړۍ هم په دې قائله ده چې : یوازې تور خطونه د افغان دولت په واک کې دي ؛ هغه هم پوره نه ! چې کله پرې تېريږي نو ، له زړونو يې یو الله خبر وي او ارو مرو به یو چېرې (د غوړیو په زېړه بوشکه ، ښوره او بوره) هم ور برابريږي ، نو چې داسې وي ؛ بیا څه اړتیا شته چې طالبان په پاکستان کې و اوسيږي ؟ دا چې د افغانستان په اویا سلنه (٪) خاوره پوره حاکمیت او سلطه ولري ، نو مناسبه به نه وي چې : د پاکستاني حکومت رحم ته ځانونه وسپاري چې هغوی يې بیا د یاسر ودګ ، بدرالدين حقاني ، ډاکټر نصيرالدين حقاني ، ملاسنګين ، ملا اختر محمد منصور او داسې ډېرو نورو… په توګه د امریکې په واک کې ورکړي چې په شهادت یې و رسوي !
نو ډېره تاواني یې بولم چې : د داسې بهانو ـ مهانو له مخې پاکستان ته د ډيورنډ په فرضي کرښه امتیاز ورکړل شي.
همدا اوس چې (د ډيورنډ په کرښه د ګډو عملیاتو) باجه چالانه شوې ؛ چې ځینې له خوشالۍ او ځنې نور يې له ناپوهۍ چکې ورته وهي ؛ که چېرې په ريښتیا سره دغه عملیات پیل شول ، نو دا به بلکل او پوره سلنه د پاکستان په ګټه او د افغانستان په زیان وي ، که ژوندي وو بیا به غږ درباندې وکړم ان شاءالله چې : ومو ليدل ! هغه دی ټول زیان یې افغانستان ته واوښت.
پاکستان په تېرايستلو کې نړیوال مهارت لري ! دا نه شي کېدای چې افغان حکومت به په دغو عملیاتو کې کومې لاسته راوړنې ته پرېږدي ، د پاکستان چې په لمانځه کې ګټه نه وي هم يې والله که پرې وکړې ، نو تاسو ولې دغې نکتې ته سم پام نه کوئ ؟
په خپله دغه (ګډ عملیات) د ډيورنډ کرښې په رسمیت دال دي.
تاسو داسې اټکل کوئ چې : ګني د کرښې کوزې خواته به لاسته راوړنه ولرئ او یا به په دغو سیمو کې طالب مشران ونيسئ ؟ نه نه ! دا بلکل ماشومانه خیال دی ! داسې فکر ونکړئ ګورئ !
هغوی یوازې کرښه د سرحد په توګه درباندې مني ، نور هېڅ نشته ! او دا هم کېدای شي چې که پاکستان په سرحد کې کومې نورې امنیتي ستونزې ولري ؛ د هغو لپاره حل پیدا کړي.
او یا خو تاسو دواړو لوریو غوڅ هوډ کړی چې : پښتانه نابود کړئ !
هغه بل ځل خو پاکستاني فوځيانو په کوزه پښتونخوا کې په لکهونو داسې پېغلې او ځوانې پښتنې تورسرې له کورنو و ايستلې چې : لمر یې لا نه ؤ لیدلی ؛ مګر دوی به لالهاندې پلې منډې وهلې او له نازکو پښو به يې وينې روانې وې ؛ چې زما به په ټول عمر هېر نشي!
په هغو عملیاتو کې د پاکستان لوی پلان دا ؤ چې : په ډيورنډ کرښه باید یو پياوړی او حاکم ((نظامي حضور)) ولري او په څنګ کې د آزادو قبائلو آزادي او اصطلاح له منځه یوسي او بل دا چې بايد د راتلونکي لپاره د دغه قشر د آزادی حق سلب کړي او نور څوک آزاد قبائل نه بلکې پاکستاني باغي وګړي ورته ووايي ؛ چې همداسې یې و هم کړل ؛ هغه خلک لا هم خپلو کورونو ته نشي ورتللای او نه څوک اجازه ورکوي ، دوی اوس هلته د ژوند کولو حق نه لري ، په داسې حال کې چې اسپندیار ولي خان او محمد خان اڅکزی ورته ګوري او غټې غټې ککرې يې نيولې ؛خلکو ته لاپې ولي چې : موږ (اصيل پوختانه يې !)
اوس نو چې ته هم په ((ګډو عملیاتو)) کې ورسره ملګری شې او یا خو لږ تر لږه اجازه ورکړې ؛ نو هغوی به (ستا د سادګۍ او ناپوهۍ له امله) خپلو اهدافو ته ځانونه و رسووي ، مګر ته به بیا هم تش بوتل یا (د بازګل کوتک) پاتې شې ؛ اشرف غني بابا پوه شوې ؟
نو خدای ته وګورئ افغانانو ! نور لږ را ويښ شئ او په لوی لاس دغه خاوره نوره مه تجزیه کوئ ، همدغه یو قراردادي (امرکا) مو بس دی ، له هر چا سره څو څو قوالې مه پرې تېروئ ؛ چې بیا یې ستاسو راتلونکې نسلونه بیه نشي پوره کولای.
اول خو طالبان په افغانستان کې دي ، ځکه چې : اویا (۷۰) سلنه (٪) خاوره يې په واک کې پرته ده او که فرض کړو چې : په پاکستان کې دي ، نو بیا يې تاته په لاس نه درکوي او نه تاته څوک اجازه درکوي چې : له کرښې کوزې خوا ته پل واخلې ، که يې واهم خلې ، نو هلته به د خوله درماته کړي چې : فعالیت وکړې ! هغوی ستاپه توګه له خاورې سره غداري نه کوي چې : ته هم ورشې او هلته پورته پورته پکې وغورځې ، هغوی یوازې امریکا ته مات دي او هغه کولای شي چې د دوی په خاوره کې (پرته له مشورې) بريدونه وکړي ، لکه په کوزه پښتونخوا او اېبټ آباد کې يې چې وکړل او لایې هم کوي ، هغوی خو پيسې ورکوي چې اجازه يې ورکړې او پاکستان پیسو ته مات دی ؛ چې په دې هکله نړیوال ريکارډ لري ! د امریکا د (C.I.A) یو قاتل کارکوونکی (چې باید اعدام شوی وای) په لوی لاس يې له زندان نه خلاص کړ او هغه بیا په دې هکله یو کتاب هم پسې ولیکلو چې ټوله کيسه يې پکې کړې او د پاکستان محاکم يې په تمسخر نيولي ، همدا راز يې د خپل سکه ورور (افغانستان) د نيولو لپاره په سر کې امريکا ته خپل ټول هوايي میدانونه په واک کې ورکړل ؛ تر څو له دغې لارې د خپل ورور کور ورته وسپاري ؛ همدغه يې وسه وه ، بنده په خپل وس نيول کيږي او هم به یې د هغوی کتارونه تر چمن او تورخم پورې ورته رسوول.
نو ته ! اشرف غني خانه خانه : چې پخپله د بل په واک کې يې او ټوله ورځ د کچکول په غاړه کې پروت وي ؛ څوک به دا اجازه لا هم درنکړي چې (کېمره) درسره یوسې او له کرښې کوزې خواته سيلفي واخلې ؛ ځان مه شرموه او کرښه مه خرڅوه.