(کابل ټکی کام ۱۳۹۶چنګاښ ۲۲)
افغان چارواکي وايي، چې له ترکمنستانه د ګازو د پايپ لاين په رارسېدو سره به په افغانستان کې د اوبلن ګاز بيې راټيټي شي.
په دغې اړه د ولسمشر سلاکار محمد شاکر کارګر رسنيو ته وويل، چې ډېر ژر به له ترکمنستانه د ګازو پايپ لاين د هرات تر تورغنډۍ پورې وغځول شي.
کارګر زیاته کړه چې له ترکمنستان څخه د اوبلن غازو د دغې نللیکې په جوړېدو سره به د اړتیا وړ غاز له ترکمنستان څخه وپېري.
نوموړي وويل، چې افغانستان به په کال کې کابو ۲۵ مېلیارده مټره مکعبه له دغې لیکې څخه وپېري.
اوس مهال افغان سوداګر د ګازو د پلورلو لپاره ترکمنستان ته ځي او له هغه ځايه يې په ډېر کړاو او لوړه بيه هېواد ته راواردوي، چې په دې سره په افغانستان کې د ګازو بيه لوړېږي.
خو د کارګر په وينا، چې د يادې نل ليکې په راتلو سره به د افغانستان سوداګر ترکمنستان ته په غازو پسې نه ځي، بلکې په مستقيم ډول به يې له تورغنډۍ پلوري.
بل پلو د تيلو او ګازو د واردوونکو ټولنه دغه چاره د هېواد په ګټه بولي او وايي چې په دې کار سره به په ژمي کې د اوبلن ګاز د نرخونو د لوړېدو مخه ونيول شي.
-الماس خدرخېل-
