د راپورونوپه اساس تیره شپه افغان ځواکونو د امریکایانو په ملتیا د اروزګان ولایت مرکز ترینکوټ اړوند سجاول سیمه کې شپیني عملیات ترسره کړي.
عملیات د تیر په څیر په پوره بې توجهي د ملکي وګړو په استوګنځایونو چې هیڅ مخالف وسلوال پکې شتون نه درلود ترسره شوي دي.
پژواک خبري آژانس د سیمې د خلکو په استناد خبر ورکړی چې په برید کې ۹ تنه ښځې او ماشومان وژل شوي او ۱۴ تنه نور ټپیان دي.
یاد آژانس ته له سیمې څخه د آدم خان په نامه یو کلیوال ویلي ګډوځواکونو یواځې د ده دکور ۸ تنه ښځې ماشومان شهیدان کړي دي.
بلخوا د ارزګان د امنیې قومندانۍ د لومړي کنډک قومندان زین الله په سجاول سیمه کې عملیات تاییدوي، خو وژل شوي او ټپيان ښځې او ماشومان ټول وسله وال طالبان بولي.
بلخوا د ارزګان ولایتي روغتون چارواکو رسنیو ته ویلي، چې له سجاول سیمې څخه ورته د ۴ ښځو او ۳ ماشومانو په ګډون یو شمېر ملکي ټپيان راوړل شوي، چې ځینې یې د سختو ټپونو له امله د کندهار روغتون ته لیږدول شوي دي.
له سیمې څخه تازه راپورونه وایي چې د ماشومانو په ګډون ۹ تنه ولسي خلک وژل شوي او تر ۲۵ نور ټپیان دي.
دیادونې وړ ده چې دوه ورځې وړاندې هم د ترینکوټ اړوند مهراباد سیمه کې د افغان ځواکونو هواېي برید کې د یوې کورنۍ ۴ میرمنې وژل شوې او یوه بله ټپي شوه.
تر اوسه د یادو هدفي ملکي وژنو په اړه نه د افغانستان د بشرحقوقو ادارې،نه هم د بښنې نړیوال سازمان او نه هم ملګرو ملتونو کوم نظر ورکړی او نه د یادو پیښو په اړه دولتي رسنیو کوم راپور ورکړی دی.
