(کابل ټکی کام ۱۳۹۶چنګاښ ۲۴)
په مصر کې د دوو جلا جلا بريدونو پر مهال دوه بهرنۍ ښځې وژل شوي او څلور نورې ټپيانې دي او په يو بل بريد کې پنځه پوليس وژل شوي دي.
پېښه تېره ورځ د دغه هېواد په غردقه ښار کې رامنځته شوې ده.
د مصر رسنيو ويلي، چې په دغه حمله کې د اوکراين هېواد دوه ښځې وژل شوي او دوه نورې ټپيانې دي.
د دغه ښار والي پېښه تائيد کړې خو په بريد کې د وژل شويو ښځو د هويت په اړه يې څه نه دي ويلي.
د سیمې امنیتي مسئول، تورن جنرال محمد الحمزاوي رويټرز خبري اژانس ته ویلي چې دوه وژل شوې ښځې د المان هېواد دي او دوه نورې ټپيانې دي.
تر اوسه د بريدګر د هويت په اړه څه نه دي ويل شوي، خو ځينو سرچينو ويلي چې بريدکوونکی د اوکراين هېواد تبع دی، د مصر د کورنیو چارو وزارت وايي چې حمله کونکی نیول شوی او تر تحقیق لاندی دی.
راپورونه وايي، چې بريد کوونکي دغه ښځې د چړو په ګذارونو وهلي دي.
بل پلو د دغه هېواد په الجیزه ولايت کې د يو وسله وال بريد په ترڅ کې پنځه پوليس وژل شوي دي.
ځايي امنیتي چارواکو رسنيو ته ويلي، چې دغه بريد د موټرسيکل سپرو وسله والو له لوري ترسره شوی او بريدګر له سيمې تښتېدلي دي.
تر اوسه د دغه بريد مسئوليت کومې ډلې په غاړه نه دی اخيستی.
-الماس خدرخېل-
