بلغاریا هیواد افغانستان ته ۵۰ نور عسکر رالیږي:
د راپورونو په اساس د بلغاریا هیواد پریکړه کړې چې افغانستان ته خپل نور اضافي عسکر هم واستوي
د دې هېواد چارواکو رسنیو ته ویلي، چې یاد سرتيري به د غوڅ ملاتړ په چوکاټ کې په افغانستان کې فعالیتونه تر سره کوي.
بلغاریا له ۲۰۱۴ کال راهیسې په افغانستان کې ۱۱۰ سرتېري لري چې د نوو سرتېرو په را رسېدو سره به یې شمېره ۱۶۰ کسانو ته لوړه شي.
دا پداسې حال کې ده چې څو ورځې وړاندې بریتانیا هم له اعلان شویو سلو تنو عسکرو څخه د ۸۵ عسکرو استول ومنل.
د یادونې وړ ده چې تیره میاشت اروپایي هیوادونو په بروکسل کې ګډه غونډه جوړه کړې وه تر څو افغانستان کې د ناټو ځواکونو ډیرولو ته هیوادونه وهڅوي.
خو په یاده غونډه کې له بریتانیا پرته بل هیڅ هیواد چمتو نشو ترڅو افغانستان ته خپل عساکر واستوي.
بریتانیا هم ویلي چې د عسکرو د استولو موخه یې روزنیزه بڼه لري.
څرګنده نده چې د دې هیواد عسکر به د جګړو لمړۍ کرښې ته اماده شي اوکه به د نورو هیوادونو په څیر د افغان ځواکونو په روزنه ځان مصروف کړي.
باید وویل شي چې امریکا هم منلې چې روان اوړي کې به له ۴ تر ۵ زرو اضافي عسکر افغانستان ته رالیږي خو د ټرمپ د ادارې د ستراتیژۍ نشتون، او د امریکایي چارواکو ترمنځ د داخلي اختلافاتو زیاتوالي دا چاره ځنډنۍ کړې او ښایي لغوه هم شي
