(کابل ټکی کام ۱۳۹۶زمری ۱۵)
د پکتيکا ولايت په ګومل ولسوالۍ کې وسله والو طالبانو له تېرې ورځې راهيسې د سرحدي ځواکونو يو کنډک کلابند کړی او سخته جګړه روانه ده.
د دغه ولايت د امنيې قوماندانۍ يوې باوري سرچينې رسنيو ته ويلي، چې تر اوسه سيمې ته نور ځواکونه نه دي استول شوي خو دواړه لوري د درنو او سپکو وسلو په مټ جګړه کوي.
د سرچينې په وينا، په جګړه کې ښکېلو غاړو ته مرګ ژوبله اوښتې خو کره شميره يې نه ده معلومه.
د پکتيکا ولايتي چارواکي په سرحدي کنډک جګړه نه تائيدوي.
خو طالبانو ويلي، چې له تېرې ورځې راهيسې يې په ګومل ولسوالۍ کې د سرحدي ځواکونو يو کنډک تر کلابندۍ لاندې نيولی او زياتوي چې د ګومل لويه لاره هم تړل شوې ده.
د طالبانو وياند ذبيح الله مجاهد رسنيو ته ويلي، چې په ياده جګړه کې د دوی دوه وسله وال طالبان وژل شوي او پنځه تنه نور ټپيان دي.
په ورته وخت کې د دغه ولايت د وړممۍ ولسوالۍ څخه هم د جګړو راپورونه ورکول کېږي.
ځايي سرچينې وايي، چې وسله والو طالبانو د يادې ولسوالۍ په دفاعي پوستو بريدونه پيل کړي، چې اوس مهال په کمکي زغمان، لوی زغمان، مڼۍ او يو شميرو نورو سيمو کې درنې نښتې روانې دي.
د پکتیکا چارواکي دغه نښتې تائيدوي او وايي چې افغان ځواکونه له خپلو سنګرونو دفاع کوي.
د طالبانو وياند ذبيح الله مجاهد وايي، په دغو جګړو کې ګڼو پوليسو ته مرګ ژوبله اوښتې خو د کره شميرو په اړه يې معلومات نه دي ورکړي.
-الماس خدرخېل-
