ليکوال : امين وردګ
اې نړيوال مفکره !
کوچى هم يې ، مګر نه پوهېږم چې : ولې شپني نه شې کولاى ؟
(راعي او رعيت) د شپانه او رمې په توګه وي ؛ که شپون له رمې سره پوه نه شي نو نه يوازې دا چې : رام کولاى يې نشي ، بلکې څرولاى او ساتلاى يې هم نه شي !
ځينې شپانه هوښيار وي ؛ کله چې له رمې سره پوه نه شي نو _ راتلونکو کړاوونو ته په کتو سره_ له هغې رمې څرولو څخه تېريږي ؛ اما ته د انساني طبيعت خلاف کړنې تر سره کوې ؛ چې همدا اکر (حالت) تا او ستا ملګرو ته ستونزې ورځ تر بلې ډېروي !
ته اوس افغاني رعيت ته د شپون حيثيت لرې ؛ نو تاته مناسبه دا ده چې ؛ يا له رمې سره ځان پوه کړې ، يا خو لدې شپنۍ تېر شې او يو داسې شپون ورته پيدا کړېچې ؛ ويې ساتلاى شي او ويې څرولاى شي !
رمه په وهلو او ربړولو نه څرول کيږي ؛ که يوه مېږه يې په لرګي ووهې نو هغه نورې لا درنه ځغلي ؛ نو يابه له رمې سره ځان پوهوې او يا به شپني پرېږدې ! .
موږ دا منو چې ؛ ته به ډاکټر يې ، اقتصادي پلانونه به جوړولاى شې ؛ اداره او انسجام به مو لوستي وي ، په حقوقو او نړيوالو اړيکو به پوهېږې ؛ مګر دلته يوه مهمه نکته شتهچې ؛ تا د هغې نکتې اهميت له پامه غورځولى دى !
مهمه نکته :
ستا د پاره مهمه نکته دا ده چې ؛ ستا مفکوره پدې ټولنه کې هېڅ مثبته نتيجه نه ورکوي ؛ ځکه چې : ستا مفکوره د غربي ټولنو د پاره رغوول شوې ده ، نه د افغاني ټولنولپاره .
زه يقين لرم !
که ته د امريکا ، يا بريتانيا رئيس جمهور شې ؛ تر هغوى به ښه اداره جوړه کړاى شې ، دا منم…! مګر د افغانستان خلک او ستا مفکوره نه سره جوړيږي ؛ هسې ځان (نړۍ ته) نور مه کمووه ، مه دا خپل ملک خرابووه ، مه دا خلک ، مه ځان تباه کووه او مه خپل راتلونکى تاريخي حيثيت له منځه وړه .
زه يقين لرم چې ؛ دلته هغه خلک حکومت او نظام نشي جوړولاى ؛ څوک چې : عامو خلکو ته اغزن بندونه اچوي !
ستاسو د نظام او رعيت تر منځ بيخي ډېره فاصله ده.
دلته يوازې د هغو خلکو حاکميت شونى دى ؛ د چا چې : ملکيان او نظاميان په يوه کاسه ډوډۍ سره وخوړلاى شي ، کنه نظام به ارو مرو ړنګيږي.
تاسو خو د هر ښار نيمايي کوڅې په اغزنو تارونو تړلې دي او بيا مو کاږه واږه کانکرټي جدول ايښي او د دې ټولو سره سره مو دوه دوه عسکر هم درولي دي _چې هر ملکي او نظامي شخص ته به برګ برګ ګوري _ نو پدې رقم خو حکومتونه نه وو او نه به وي ان شاءالله
موږ حکومتونه ليدلي دي ، داسې شرميدلي کارونه نه کوي لکه ستاسو !
خوشې کړه دا د غم څوکۍ ، د پښتنو تاريخ نور مه بربادوه .
