(کابل ټکی کام ۱۳۹۶ زمری ۱۸ فرید افغان)
د راپورونو په اساس هند منلې ده چې افغانستان ته به په پراخه کچه د غنمو صادرات زیاتوي.
د چابهار بندر چارواکو ایراني رسنیو ته ویلي، چې هند ترې د ۳۵ زره کانتنره غنمو د لېږد جواز اخیستی دی
د هند د ستراتیژيکو مطالعاتو د مرکز مشر جان پراستاد په افغانستان کې د چابهار په اړه د ایران، افغانستان او هند ګډې جوړې شوې غونډې ته ویلي، هند له افغانستان سره د سل زره ټنه غنمو د مرستې اعلان کړی دی چې ټاکل شوې ده دغه غنم راتلونکې اوونۍ د چابهار له لارې افغانستان ته را ولېږدول شي.
د بلوچستان-سیستان د ستندرد ادارې مرستیالې سکینې اشرفي رسنیو ته ویلي چې ددغو غنمو د لېږد لپاره به هره ورځ سل بار وړونکي موټران له چابهار بندر د افغانستان په لور حرکت کوي
دې چارواکې ویلي چې ایران افغانستان او هند د چابهار بندر لاپراختیا ته ژمن دي او په وینا یې چې پدې بندر کې به نوې تولیدي فابریکې هم جوړې شي.
باید وویل شي چې افغانستان ته اوسمهال د پاکستان او قزاقستان اوړه او غنم هم راځي چې د هند غنم یې ښایي بازارونه پیکه کړي.
د هند د غنمو د لیږد اعلان داسې مهال کیږي چې له دې هیواد سره دهوایي ترانزیټ له لارې د میوو لیږد هم دریدلی چې سوداګرو ته یې میلونونه دالر زیانونه اړولي دي.
