طالبان په جانخيلو ولسوالۍ کې د پرمختګ خبر ورکوي
(کابل ټکی کام ۱۳۹۶زمری ۲۱)
وسله والو طالبانو څو ورځې وړاندې د دوهم ځل لپاره د دغه ولسوالۍ د نيولو خبر ورکړ، خو اوس يې په يوه تازه خبرپاڼه کې ويلي، چې له يادې ولسوالۍ يې ټول دولتي ځواکونه په شاه کړي او دوی يو شمير سيمې نيولي دي.
د طالبانو له لوري کابل ټکی کام ته په رالېږلې خبرپاڼه کې راغلي، چې د دوی وسله والو په سيمه کې په پاتې پوستو او د جانخيلو له جګړې څخه په تښتېدلې قوه بريدونه کړي دي.
د طالبانو وياند ذبيح الله مجاهد ويلي، چې د جانخيلو له مربوطه ټولو سيمو يې دولتي ځواکونه په شاه کړي او په ترڅ کې يې د ريچکې مهمه سيمه او درې پوستې نيولي دي.
نوموړی زياتوي، په دغه جګړه کې ډیری عسکرو ته مرګ ژوبله رسېدلې چې د درې تنو جسدونه يې لا هم د جګړې په ډګر پراته دي او په خبره يې چې ځينې نور ټپيان او پاتې عسکرو له سيمې پښې سپکې کړي دي.
دغه راز طالبانو د درې ميله وسلو او يوه اندازه پوځي توکو او مهماتو د نيولو خبر هم ورکړی دی.
طالبانو ويلي، په دغه جګړه کې يې يواځې درې تنه ملګري ټپيان شوي دي.
که څه هم چارواکو د يادې ولسوالۍ د دوهم ځلې پرېښودل منلي و، خو د تازه نښتو او ورته د اوښتو تلفاتو په اړه يې تر دې دمه رسنيو ته څه نه دي ويلي.
